Borgmesterit silaannarmut akiuiniarnermi pisussaaffilerput
Illoqarfinni ukiuusartuni borgmesterit CO2-mik aniatitsimik annikillisaaniarluni suliniarnermi sallersaaniarlutik ataatsimoortumik isumaqatigiissutikkut neriorsuipput.
Illoqarfittut nillertumik silaannalittut, apinikkaatut taamaattumillu aamma assersuutigalugu kiassarnermut aputaajaanermullu nukissiuutinik annertuumik atuiffiusartutut World Winter Cities Association of Mayors-imi, WWCAM, ilaasortat namminneq CO2-mik aniatitsinermut annertunerulersitsinermut peqataapput.
Tamannarpiarlu peqqutigalugu illoqarfiit taakkua borgmesteriisa nuarsuaq tamakkerlugu silaannaap kissatsikkiartorneranut akiuunniarnermi ilisimasanik avisseqatigiinnikkut suleqatigiinnermi ataatsimoortumillu suliniuteqarnermi nunarsuarmi siuttuunissaminni pisussaaffitsik akisussaaffitsillu nassuerutigaat.
Tamanna nunanit peqataasunit 11-iusunit illoqarfiit ukiuusartut borgmesteriisa tamarmik isumaqatigiissutigalugu »Nuummi Isumaqatigiissut 2008«-mik taallugu oqariartuutigaat. Isumaqatigiissut Nuup borgmesterianit Nikolaj Heinrichimit aamma WWCAM-ip præsidentianit Sapporo-mi borgmesteriusumit Fumio Ueda-mit sapaatiummat atsiorneqarpoq.
Nuummi Isumaqatigiissut 2008-p atsioqatigiissutiginerata saniatigut ataatsimeersuarnermi ataatsimiitsitaliamik pilersitsineq angusaavoq, ataatsimiitsitaliaq taanna illoqarfiit ilaasortaasut suliniutinik avatangiisinut illersuutaasunik piujuaannartitsisunillu ingerlatsinerannik eqqortitsinersut nakkutiginnittussaavoq, aammalu Alaskami Anchorage-mi allattoqarfeqarlunilu angerlarsimaffeqassalluni.
Nuummi borgmeseriusimasoq Agnethe Davidseniugaluaq ukiut sisamat matuma siornagut WWCAM 2008-p ataatsimeersuarnissaanut Nuup ataatsimiiffiunissaanut neqerooruteqartuusimasoq aammalu ataatsimeersuarnermi Issittumi silaannaap alanngoriartorneri oqallisissat pingaarnersarissagaannik siunnersuutigeqartuusimasoq aamma suleqatigiiffimmi ataqqinaammik ilaasortanngortinneqarpoq.
Aaqqissuussineq tamarmiusoq, borgmesterit ataatsimeersuarnerisa saniatigut aamma saqqummersitsinermik EXPO-mik kiisalu Forum-imik - tassaasoq ilisimatuut nunat tamat akornanni ilisimaneqarluartut assigiinngitsut oqalugiaqattaarfiat - sapaatiummat Nuup illoqarfiatigut ikumatilisaarluni ingerlaaqatigiinnermik naggaserneqarpoq.
World Winter Conference for Mayors-it tullianik 2010-mi canadami illoqarfimmi Prince George-mi ataatsimiissapput.