Skip to main content

Silaannaq Nuummi sammineqartoq

Nuummi World Winter Cities-imi ataatsimeersuarnermi silaannaap allanngoriartornerata kingunerisai illoqarfiit ukiuusartut borgmesteriisa ilisimatuullu oqaluuseraat.

Issittumi silaannaap allanngoriartornerisa sammineqarnissaat borgmester Agnethe Davidsen-iugaluup isumassarsiareqqaarsimavaa, taamanikkut ukiut sisamat matuma siornagut Nuup World winter Cities-imi ataatsimiiffiunissaanik neqerooruteqarneranut atatillugu pinngorsimasoq.

- Taamaattumik nuannaarutigaara borgmesterit ilisimatuullut Nuummi Winter Cities 2008-mut tikilluaqqusinnaagakkit, Nuup borgmesteria Nikolaj Heinrich WWCAM-ip præsidentia Fumio Japanimi Sapporo-mmersoq peqatigalugu tikilluaqqusigami oqarpoq. WWCAM »World Winter Cities Association for Mayors«-ip naalisarneraa.

Alaskamiit, Norgemiit, Estandimiit, Litauenimiit, Koreamiit, Japanimiit, Kinamiit Kalaallit Nunaanniillu illoqarfinni 11-ni borgmesterit ilaatigut oqallisigissavaat Issittumi meeqqat inuusuttullu atugaat aamma illoqarfimminni aseroriartuutaanngitsumik ineriartortitsinerit, sapaatiuppallu ataatsimoortumik Nuummi Isumaqatigiissutip atsioqatigiissutiginissaa anguniartussaallugu.

Borgmesterit ataatsimeersuarnerannut atasumi Forum-eqarpoq, taakkunani silaannaap allanngoriartornerinut tunngatillugu immikkut ilisimasallit oqalugiaqattaarnerit ingerlaneqassapput, ammaanersiornermilu oqalugiartut pingaarnersaraat Carl Egede Bøggild, Nuummi inunngorlunilu alliartorsimasoq, maannalu Svaldbard-imi ilisimatusarfimmi ilisimatuujusoq.

- Kalaallit Nunaata sermersuanut tunngatillugu ilisimasagut ilisimatusarnerpullu nutaarujussuuvoq. Nalinginnaasumik ilisimatusarnissamut aningaasatigut killilersimaaneqartarsimavoq, ajornakusoorpoq akisullunilu, aammalu tusaamasanngorniarsinnaanermut attuumassuteqarpallaarsimanani, Carl Egede Bøggild nassuiaavoq.

Taamaattorli pissutsit tamakku pillugit annertuumik ilisimasaqarnissap pingaarutilerujussuunera erseqqissarpaa. Nuarsuarmi sermitarsuit sermillu sisujartortuartut aakkaluarpata nuarsuarmi imarpissuit 15 aamma 40 centimeterit missaannik qaffassagaluarput – kalaallit nunaatali sermersua tamarmi aassagaluarpat immaq 7 meterit qaangerlugit qaffassagaluarpoq! Aamma sermersuaq silaannaap allannguutaanut maannamut ilimagisamit annertunerusumik malussarinnerujussuuvoq.

- Taamaattumik susoqarnera pillugu ilisimatusarnissaq pingaaruteqarpoq. Aammali siulittuutit tamarmik nalorninartoqarnerat erseqqissassallugu pingaarpoq, taamaattumillu sermersuup siunissaa pillugu uanga inuttut qanoq isumaqarnersunga aperineqaraangama akissutigisartagara tassaavoq naluara, Carl Egede Bøggild naggasiivoq.

Carl aamma Nuummi innuttaasut qaammaasaqarnerulersinnaassapput, immikkut ilisimasallit sammisat soorlu "2020-imi silaannaq", "Qalasersuaq avannarleq 2040-mi sikuersimassava?" aamma "seqernermi anorersuit silaannaap allanngoriartornerinut pisuusuviuppat?" ulluni marlunni oqaluuserereersimalerpatigit.

Borgemesterit ataatsimeersuarneranni politikerit oqallinnerisa ilisimatuullu Forum-imi misilittakkaminnik oqalugiaateqaqattaarnerisa ilisarititsinerisalu saniatigut aamma tikeraarpassuit Nuummilu innuttaasut tallimanngornermi ualikkumiit Inussivimmi saqqummersitsivimmi EXPO-mi saqqummersitsiviit takuniarsinnaavaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER