Silaannaap aalarulunnerata Air Greenland akornusersorpaa

Selskabip timmisartorsua ataasinngormat utiinnartariaqarsimavoq Kangerlussuarmi silaannaap aalarulunnerujussua pissutigalugu. Timmisartut suluusallit Dash-7 pingasut aamma missinnaasimanngillat.

Norsaq Kangerlussuarmi mittarfimmi. Assi toqqorsivimmit.

Air Greenlandip atlantikoq qulaallugu timmisartorsua Norsaq ullumi Kangerlussuarmut missinnaasimanngilaq, mikkiartornermi silaannaap aalarulunnerujussua pissutigalugu. Taamaattumik Københavnimut utiinnartariaqarpoq, ilaasullu tappavani unnuisariaqarlutik.

Tamatuma saniatigut timmisartut DASH-7 pingasut, Nuummeersut aamma Ilulissat/Aasianneersut Kangerlussuarmut missinnaasimanngillat silaannaap aalarulunnerujussua pissutigalugu.

Air Greenlandip maanna tamaviaarluni marlunngornermi timmisartuussinissat pilersaarusiorpai, ilaasut kinguaattoortut aqagu sumunngarfiannut apuutsinniarlugit.

Powered by Labrador CMS