Nuummi Ilinniarnertuunngorniarfimmi pisortaq toqqarneqarpoq
Pisortaagallartoq Henning Ditlevsen Nuummi Ilinniarnertuunngorniarfimmi pisortanngortinneqarpoq.
Qeqqani Ilinniarnertuunngorniarfimmi pisortatut Margit Motzfeldtimut kingoraartissatut toqqarneqarpoq Henning Ditlevsen, 47-nik ukiulik. Taanna decembarimili pisortaagallartutut atuuffeqarsimavoq..
Henning Ditlevsen Nuummi Ilinniarnertuunngorniarfimmi ukiuni 13-issaat avillugu sulisimavoq, tassani nipilersornermik filosofi-milu ilinniartitsisuusimalluni. Pisortatut sulineq pissanganarlunilu unamminartorpassuaqarpoq, isumaqarpoq. Minnerunngitsumik Ilinniarnertuunngorniarfik suliassanik annertuunik ilaatigut nutarterinermik suliassaqartussanngussagami.
– Suliassat annertuut amerlaqaat, suliassarlu uannut assut unamminarpoq, Henning Ditlevsen Sermitsiaq.gl-imut oqarpoq.
Henning-ip aamma taavaa sulisussanik pilerilersitsiniarnermik suliassaqartoq, minnerunngitsumik kalaallisut ilinniartitsisussanik.
– Isumaqarpunga ullutsinni kalaalinngorsaaneq ingerlanneqartillugu ilinniartitsisunik kalaallisut ilinniartitsisinnaasunik pissarsiniarnissaq, Henning Ditlevsen oqarpoq, nangilunilu oqaatigalugu timelærerit kalaallisut ilinniartitsinermi atorneqarnerat piffissaq sivisunerusoq eqqarsaatigalugu naammaginartuunngitsoq.