Namminersorneq pillugu innuttaasut nov. 25-iani taasissapput
Tamanna sioqqullugu innuttaasuni paasititsiniaanerit oqallinnerillu pereerpata namminersulernissaq pillugu innuttaasunik taasititsisoqassaaq, Naalakkersuisut siulittaasuat Hans Enoksen ukiortaami oqalugiarnermini oqarpoq.
Kommunerujussuanngortussanut siulersuisussanik apriilip 8-ni qinersisussaavugut, soorluli namminersorneq pillugu innuttaasut 2008-mi novembarip 25-iani taasitinneqassasut. Kisianni tamanna aatsaat pissaaq innuttaasunut paasititsiniaasoqareerlunilu oqallitsitsisoqareerpat, Hans Enoksen ukiortaami oqalugiarnermini oqarpoq.
– Kommunerujussuanngortussanut siulersuisussanik qinersinermut peqatigitilugu pisussat taakku marluk peqatigiinnissamut, suleqatigiinnissamut minnerunngitsumillu ineriartortitsinissamut annertuumik ammaassissapput. Periarfissat taakku marluk atorluarutsigit eqaatsumik aqutseriaaseqarnissamik kinguneqartussaapput, taamalu suli annerttunerusumik namminersulernissamut piareersimanerulernermik kinguneqartussaassallutik.
– Inuiattut annertunerusumik namminiilernissaq anguniartuartariaqarparput, tassami taamaaliunngikkutta ineriartornissatsinnut immitsinnut uagutsinnullu ajoqutaasinnaasumik aporfissiuutissaagut.
– Akisussaaqataanerulerneq ineriartornermik malitseqartarpoq. Akisussaaffeqanngitsumik ineriartorneq ilatsiinnarnermik, unittoornermik sorlaarusimaarnerillu malitseqartarpoq. Inuunermi anguniagaqanngikkaanni illiniliornissaq ajornakusoorsinnaavoq.
– Naminersulernissamut aqqutissaq aallartereerparput, taamalu alloriarnerup tullissaa tigussallugu pingaarutilerujussuuvoq. Tassuunakkut suliassaqarfiit amerlanerusut tigusinnaalissavagut, aningaasarsiorsinnaanikkullu periarfissanik nutaanik ammaasissalluni, Hans Enoksen oqarpoq.