Skip to main content

Qummoroortartup oqaluffik ikuallatsigunarpaa

Alluitsup Paani oqaluffik nungulluni ikuallattoq misissuiffigereerlugu Nanortalimmi qatserisartut ilimagaat ikuallanneq qummoroortartumik maangaannaq ingerlasimasumik pissuteqartoq.

– Oqaluffiup isaariaata qulaani napasuliaaraqarpoq qanga siarngup nivingaffigisimasaanik. Siarngulli oqaluffiup saniani nammineq napasulialerneqarnerata kingorna oqaluffiup isaariaata qulaani napasuliaaqqap putua matuneqarsimanngilaq. Qularnanngitsumik qummoroortartoq maangaannaq ingerlasoq napasuliamut isersimassaaq oqaluffiullu oqorsaatai 1926-imersut qummoroortartumik ikummartinneqarsimallutik, Nanortalimmi qatserisartut naalagaat Peter Mathiassen Sermitsiamut oqarpoq.

Tamannali uppernarsivinneqarsimanngimmat Nanortalimmi politiit tallimanngorneq januarip sisamaat Alluitsup Paa-nut misissuiartorniarput.

– Siullermik ilimatsaassimagaluarparput innaallagissap aqqutaasa ajutoornerannik pissuteqarsimasinnaavoq. Taanna nassuiaat aamma taamaativinngilarput. Aammali qatserisartut nassuiaanerattut tassaasinnaavoq qummoroortaat siarngup napasuliarisimasaanut pulasimasoq sila anorlersorsuummat, taama Sermitsiaq.gl-imut oqarpoq Nanortalimmi politiit pisortaat Niels Nyvang.

Alluitsup Paani qatserisartut ukiortaap unnuaani kinguneqanngitsumik tamaviaaraluarput nunaqarfiup oqaluffia nunguilluni ikuallammat toqqavia kisimi sinnerulluni.

– Qatserineq pissusissamisut aallartinneqarsimagaluarpoq. Sakkortuumilli anorlersimavoq issillunilu, tamannalu pissutigalugu qatserutit sullulittaannut pumpi piffissap ilaani qerisoorsimavoq, Peter Mathiassen oqarpoq.

Taamaasilluni ukiutoqqami naalagiarneq oqaluffitoqqami kingullersaavoq ukiortaamilu naalagiarneq utoqqaat illuanni ingerlanneqarpoq. Maannalu Alluitsup Paani ilagiit sinniisai naalagiartarfiugallartussamik ujarlerput.

Naatsorsuutigineqarmat januarip 6-ianni kunngit pingasuni naalagiat amerlajumaartut naalagiarnissaq nunaqarfiup timersortarfeeraani ingerlanneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER