Nuup Kommuneani Qaquk eqqissisimatitanngortittariaqarpoq
Pinngortitamik avatangiisinillu illersuiniaqatigiiffiit Timmiaq-p aamma Avataq-p Akiata kujataatungaaniittup Qaquup eqqissisimatitanngortinneqarnissaa siunnersuutigaat.
Eqqissisimatitanngortitsiniarnermi siunertaavoq nunap immallu tamaaniittup immikkorluinnaq ittup umiarsuavililiornernit, suliffissualiortiternernit, illoqarfiliornernit, aatsitassanik piiaaffinnit illuaqqiorfinnillu aserorterneqalinnginnissaa, akerlianilli tamaani pinngortitap pisuussutaasa ineriartortinneqarnissaa anguniarneqassasoq.
Timmiaq-p Avataq-llu Qaquup pinngortitaassutsimigut kangerloqarnermigut ikerasaqartiternermigullu immikkorluinnaq ittuusoq timmissatigut, aalisakkatigut imaanilu miluumasoqarnikkut kingunerluuteqarsinnaasoq assut ernumanartoqartippaat.
Hasse Hedemand Timmiaq-meersoq aamma (kalaallit Nunaanni timmissanik illersuiniaqatigiit) Uwe Lindholt Avataq-meersoq (Kalaallit Nunaanni pinngortitamik avatangiisinillu illersuiniaqatigiit) oqarput: – Qaquk suliffissualiortiternerup, illoqarfiliornerup, umiarsualiviliornerup aqqusinniornerullu pinngortitamut immikkorluinaq ittumut tamaanga ajunarnersuussaaq, Qaqummi akianilu pinngortitaqassutsimut takorloorneqarsinnaanngitsumik kinguneqapilussinnaalluni, aammalu Nuummi innuttaasut pinngortitamik pisuumik illoqarfimmut qanittumiittumik misigisaqarsinnaallutillu atorluaasinnaanissaanut periarfissaat atorsinnaajunnaarsissallugit.
– Qaquk ikkattukajaajunermigut marrartarasaarnermigullu mingutsitsisnernut suliffialiornerup illoqarfiliornerullu kingunerisaanik ilersussanut malussarissorujussuusussaavoq. Uani pineqarput inuussutissaqassutsimik artukkiinerit, toqunartulinnik mingutsitsinerit uuliamillu mingutsitsinerit.
– Nuup Kangerluata paava Kalaallit Nunaata kitaata kujasinnerusortaani timmissanut imarmiunut ukiisarttunut pingaarutilerujussuuvoq. Qaqummiinnaq ukiuunerani mitit 5.000-it 8.000-illu akornanni amerlassisillit tamaaniissinnaasarput.
– Taamaattumik Timmiaq-p Avataq-llu Nuup Komunea Namminersornerullutik Oqartussallu kajumissaassavaat nunap ilaani pineqartumi nakkutilliinermik aaqqissuussinermik pinngortitamik illersuinissamik tamaanilu qangaaniilli pinngortitamik atorluaarnermik salliutitsisumik pilersaarusioqqullugit, taamalu illoqarfiliornissamik suliffissualiortiternermillu pilersaarutit nunap immikkoortuanut allamut nooqqullugit, Hasse Hedemand aamma Uwe Lindholt oqarput.