Skip to main content

Mamarliisarneq unitsillugu

Mamarliisarnermiit oqaloqatigiilluarnermut. Paamiuni Peqqissaaviup tamanna ukiut aappaata affaani angusimavaa

Siusinnerusukkut Peqqissaavimmi nanertisimanartarsimavoq, inuit imminnut kumuuginnartarlutik, isimikkullu imminnut qiviaruminaatsitsisarlutik.

– Ullumikkut misigisimasatsinnik immitsinnut oqaluttuallaqqissisimavugut, Paamiuni Dronning Margrethep Peqqissaaviani peqqissaasuuneq Margrethe Vogt Christensen oqarpoq. Peqqissaavik Suliffigissaasunit 2007-imi Ukiumi Suliffitsialattut toqqarneqaqqammerpoq, Nuup Kommuneani Isumaginninnermut Ingerlatsiviup ataani Isumaginninnermut Immikkoortoqarfik peqatigalugu.

Suliffeqarfiit taakkua marluk taamatut toqqarneqarput pissutigalugu sullivimmi avatangiisinik tarnimut pitsaasunik pilersitsisinnaasimammata, Peqqissaavillu aamma toqqarneqarpoq pissutigalugu sullivimmi ajutoornerit pitsaaliornerat annertuumik sammitissimammagu.

Imminnut paatsoortut

Peqqissaasuuneq Margrethe Vogt Christensen oqaluttuarpoq ukiut aappaata affaata matuma siornatigut Peqqissaavimmi mamarliisoqartartorujussuusimasoq. Nanertisimanartarsimavoq suliamillu nuannarinninneq tammaleraluarsimavoq napparsimasunut sunniuttumik.

– Nanertisimanarnerup takutissimavaa illumi iluarsisassaqartugut. Sulisut ataatsimiittarnerini tamanna arlaleriarluta sammisarsimavarput, annertunerusumillu sammineqarnissaa pisariaqarsimammat peqqissaavimmi sulisunut tamanut oqaloqatigiilluarnissamik pikkorissartitsisimavugut, Margrethe Vogt Christensen oqaluttuarpoq.

Pikkorissarnermi sulisut ilinniarpaat pisariaqartitat misigissutsillu aallaavigalugit qanoq oqaloqatigiittoqarsinnaanersoq, unnerluussiuaannarani naliliiuaannaranilu.

– Uagut inuit immitsinnut paatsoortarpugut allallu oqaasii paasinerluttarlugit. Taamaattumik pingaaruteqarsimavoq sammitissallugu qanoq pingaaruteqartigisoq allat nalunaarutaasa qanoq paasineqarnissaat apeqqutigissallugu. Maani peqqissaavimmi tamatumunnga pikkorissorujussuanngorsimavugut, Margrethe Vogt Christensen oqarpoq.

Qiimaneq pingaaruteqarpoq

Ullumikkut sulisut oqaloqatigiillaqqipput paatsuuisoqaraangallut isummaminnik annissisarlutik.

– Qungujunnartulerisinnaaneq ulluinnani atorfissaqartittorujussuuvarput, illumilu maani illartaqaagut. Tamanna qiimanarpoq nuannisarnarlunilu - napparsimasunullu sunniuttarpoq. Qullersat aamma paasissutissiillaqqinnerujussuanngorsimapput, taamaattumik sulisut toqqissisimanerulerput, Margrethe Vogt Christensen oqarpoq.

Pitsannguinerit tamakkua saniatigut sulisut tamarmik neqeroorfigineqarsimapput peqqissaasuunermit ilitsersorneqarnissaminnik kiisalu neqeroorfigineqarsimallutik sulinerup nalaani oqaloqatiginnillatsiartarnissaminnut.

– Tamatta oqaloqatiginnillatsiarneq atorfissaqartissinnaasarparput - suliffik namminerluunniit inuuneq pillugu. Taamaattumillu pingaaruteqarpoq sulisut suliffimminni tamatumunnga periarfissaqarnissaat, Margrethe Vogt Christensen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER