Kangerlussuarmi mittarfimmi tikittarfiup illutaa allineqalerpoq
Kangerlussuarmi mittarfimmi tikittarfiup illutaa allineqassasoq Inatsisartut Aningaasaqarnermut Ataatsimiititaliaata akuersissutigaa.
- Imarpik qulaallugu timmisartunut mittarfiit allat pilersinneqarnissaasa tungaannut, timmisartumik ilaallutik angalasut amerliartornerat sillimaffiginiarlugu, aqqusaartunut utaqqisarfiup illutaata 2008-mi allilerneqareernissaa pisariaqartoq Naalakkersuisut ataatsimut isigalugu naliliipput, Ineqarnermut Attaveqarnermut Aatsitassanullu Naalakkersuisoq Kim Kielsen oqarpoq.
Kangerlussuarmi mittarfimmi tikittarfiup illutaata pitsanngorsaavigineqarnissaa takornariartitsinermik angallassinermillu suliaqartunit kiisalu Inatsisartunit qangalili kissaatigineqarpoq, taamaalilluni aqqusaartunut utaqqisarfimmi inissaqartitsineq timmisartunut ilaallutik nunatsinni angalasut massakkut amerlassusaannut aammalu siunissami amerlassuserilerumaagassaannut naleqqussarneqassammat.
- Angallannerup annertusiartornerata nassatarisaanik suliassat pisariaqartitsinerillu ingerlaavartumik takkussorumaartussat Angallannermut Naalakkersuisutut tamanut iluaqutaasumik aaqqiivigineqartarnissaasa isumagineqarnissaat pisussaaffigaara, Ineqarnermut, Attaveqarnermut Aatsitassanullu Naalakkersuisoq Kim Kielsen oqarpoq.
- Taamaattumik assut nuannaarutigaara Kangerlussuarmi mittarfimmi tikittarfiup illutaata pisariaqartumik pitsanngorsaavigineqarnissaa pillugu Naalakkersuisut siunnersuutaat Inatsisartut Aningaasaqarnermut Ataatsimiititaliaata tapersermagu, taamaalilluni Ilulissani Nuummilu timmisartunut mittarfiit tallineqarnissaasa tungaannut nunatsinni angallannermi qitiusumik aqqusaartakkami timmisartunik ilaallutik angalasut amerliartornerat sillimaffigineqarsinnaalissaaq, Naalakkersuisunut ilaasortaq Kim Kielsen naggasiivoq.
Kangerlussuarmi mittarfimmi tikittarfiup illutaata pitsanngorsaavigineqarnissaata pisariaqarnera, kingullermik Ilulissani Nuummilu timmisartunut mittarfiit tallineqarnissaat pillugit aalajangiiffigisassatut siunnersuutip Inatsisartuni suliarineqarneranut atatillugu saqqummiunneqarpoq.