Sisimiuni atuarfik namminersortoq nutaaq
Sisimiuni angajoqqaat arlallit atuarfimmik namminersortumik, meeqqat atuarfiannut tapertaasussamik, pilersitsinialerput.
Pilersaarusiorneq naammassereerpoq Sisimiunilu atuarfik namminersortoq, den internationale friskole, 2008-mi augustimi ammassaaq. Suliniuteqartut naatsorsuutigaat atuarfiup namminersortup aallaqqaammut meeqqat 1. klassimiit 6. klassimut atuartut tigusinnaassagai, taamatut allappoq knr.gl
Suliniuteqarnermut tunuliaqutaavoq kissaatigineqarmat tamakkiinerusumik atuartitseriaaseqarnissaq, atuarfimmik mikinerusumik toqqissisimasunik avatangiisilimmik pilersitsinissaq, atuartitseriaatsillu atuartunik ataasiakkaanik samminnerusup atornissaa.
- Meeqqat angajoqqaallu atuarfimmi avatangiisini toqqissisimallutik misigisimassapput. Atuarfiup namminersortup akuersaarsinnaanngisatuaa tassaavoq iluarisaqanngeqqajaaneq. Atuarfiup namminersortup pingaartippaa atuartut ammasuunermik, akaarinninnermik aammalu assigiinngissutsimik ataqqinninnermik ineriartortitsinissaat, angajoqqaat suliniutillit Ellen Kreutzmann, John Plambæk, Hanne aamma Johan Harder Meyer oqarput.
Sisimiuni atuarfik namminersortoq angajoqqaanit aqunneqassaaq, atuarfillu nunatsinni inuiaqatigiinni naleqassutsit tunngavigalugit ingerlanneqassaaq.