Polaroil-ip qullersaqarfia Maniitsumiiginnassaaq
Tamanna KNI A/S-imi siulersuisuni ataatsimiinnermi naammasseqqammertumi aalajangiinerit ilagaat.
Polaroil-ip qullersaqarfiata Maniitsumiiginnarnissaanik aalajangernersup saniatigut aamma Aasiaat illloqarfiani pisiniarfeqalernissamut periarfissaq nalilersorniarneqarpoq, pisiniarfik umiarsualivimmi quersuup ilaani siusinnerusukkut pisiniarfiusimasumi inissinneqassaaq, maanna Pisiffiup KNI-llu akornanni unamminneqatigiinnermut killilersuutit atorunnaarmata.
Aasianni nuna tamakkerlugu uigulukuttunik atuuttunik pisiniarfimmik ataasiinnarmik peqarpoq, taamalu KNI A/S illoqarfimmi innuttaasuniit kajumissaarneqarsimavoq, illoqarfimmi pisiniarfimmik ammaaqqullugu. Saniatigut aamma Aasianni qullersaqarfiup matuneqarnissaa unitsinneqarpoq.
2008-mut aningaasaqarnikkut missingersuusiat akuersissutigineqarput, siulersuisullu naammagisimaagaannik 2007-imi oktobarip naanerata tungaanut piffissakkaartumik naatsorsuutit KNI-mi suliffissuarmut naammaginartumik inerneqarsimapput.
Ataatsimiinnermi aamma piginneqatigiiffiup KNI-p 2010-mut Periusissatut Iliuusissatullu Pilersaarutaa oqaluuserineqarlunilu inaarutaasumik akuersissutigineqarpoq. 2008-mi suliassat annersaat tassaassapput ilinniartitaanermut tunngasuni malunnaatilimmik suliniutissat, taakku ukiuni kingulliunerusuni piginneqatigiiffimmi aningaasarliornermik peqquteqartumik kinguarsarneqartarsimapput.
Aammattaaq niuertarfiit uigulikuttut Pilersuisup iluani niuernikkut periarfissarititaasut atorluarneqarsinnaanerata annertusarnissaa siunertaralugu suliniutissat annertuut aallarnisarneqassapput, 2008-mi nalinginnaasumik silatusaartumik niuernikkut ingerlatsineq niuernikkullu ingerlatseriaatsit salliutinneqassallutik.
Siulersuisut Københavnimi pisiniarfiup Arctic Greenfood-imut tuninera Aalborgimilu qitiusumik poortuisarfiup matunera pitsaasutut taallugit tusaatissatut tiguaat, taamalu KIN A/S-ip iluani sipaarniutissanik pisariaqartunik nassaarniarnermut alloriarnertut pingaarutilittut taallugit.
Piginnittuusut siulersuisullu siusinnerusukkut naatsorsuutinut inissitsiteririaatsit nutaat ujartortarsimavaat, naatsorsuutinik naatsorsueriaatsit niuernerpalaartumik niuernerpalaanngitsumillu inissitsiteriaatsinut immikkoortitsisut, ilaatigut taakkunatigut kiffartuussinissamut isumaqatigiissutitigut akiliutit qanoq atorneqarnerat ersersinniarneqassaaq, aammalu illoqarfinnik unammilleqatigiiffiusuni iluanaarniutigalugu niuerfiusuni kiffartuussinermut isumaqatigiissummi akiliutinit tapiiffigeqatigiiffeqannginnissaannik qularnaarinnittuuniartussaallutik.