Iisartagaq pujortarunnaarsitsiniut ulorianartoq

Nakorsaatinut nakkutilliisoqarfiup maanna iisartagaq pujortarunnaarsitsiniut Champix mianersoqqussutigaat, nikallungalernermik imminoornissamullu eqqarsaateqalernermik kinguneqarsinnaanera pillugu. Iisartagaq taanna Kalaallit Nunaanni atorneqarpoq.

Iisartagaq pujortarunnaarsitsiniut Champix imminornissamik eqqarsartitsilersinnaasutut pasineqarpoq. Nakorsaatinik nakkutilliisoqarfiup maanna iisartagaq taanna pillugu mianersoqqusuteqarput.

Nuummi nuna tamakkerlugu nakorsaataateqarfiup iisartakkat pujortarunnaarsitsiniutit taamaattut marlussuit tunniussimavai, naak taanna pujortarunnaarsitsinarnermi nalinginnaasumik katsorsaarnermi ilaanngikkualuartoq, knr.gl allappoq.

Iisartagaq nakorsaasiorfissuarmit Pfizer-imit sanaajusoq Danmarkimi ukioq ataaseq niooqutaareerpoq, ukioq mannalu kvartalit siulliit pingasut ingerlaneranni Champix-it poortat aallaqqaasiutit 11.824-t nalinginnaasullu 19.470-it tunineqarsimapput, nakorsaatinik nakkutilliisoqarfik ilisimatitsivoq.

- Nakorsamit allagartaleqqaarlugu aatsaat tunniunneqarsinnaavoq, inunnullu taamaallaat piumallugu kissaateqarsimasunut tunniunnikuullugu. Inuit taakku aamma iisartagaq taanna akeqqaarlugu pisimavaat, taanna pujornarunnaarniarnermi nalinginnaasumik katsorsaanerup ataaniinngimmat, nakorsaasiornermut ilisimatooq Dorthe Jørgensen knr.gl-imut oqarpoq.

Pisariaqartinneqassappat qaammatini tulliuttussani napparsimalersimasuttut nalunaarutigineqarsimasut sukumiinerusumik misissorneqassappput, nakorsat napparsimasullu sukumiinerusumik ilisimatinneqassallutik.

Powered by Labrador CMS