Angerlarsimaffeqanngitsut juulliat aningaasaliiffigaat
Suliniutit assigiinngitsut inuillu ataasiakkaat Namminersornerullutik Oqartussat Inuuneq Nakuuneq-mut aningaasaateqarfiannit agguarneqarput.
Namminersornerullutik Oqartussat Kalaallit Nunaanni inuunerup pitsaanerulernissaa anguniarlugu pinaveersaartitsinermik peqqinnerulernissamillu suliniutinut tapersersuilluni aningaasaateqarfia Inuuneq Nakuuneq suliniutinut assigiinngitsunut agguaavoq.
Ukiormannalu aningaasaliiffigineqartut tassaapput:
”Nuummi angerlarsimaffeqanngitsunik/kisimiittunillu juullisiortitsineq”-mik piumassutsiminnik suliniuteqartunut: Kr. 20.000.
Pilersitsineq 2006-mi aallartinneqarpoq ukioq mannalu ingerlanneqaqqissalluni, tamanna Nuummi angerlarsimaffeqanngitsunit kisimiittunillu nuannaarutigineqarluarpoq.
Nuummi angajoqqaarsiaasartut peqatigiiffiat: Kr. 20.000.
Meeqqanik inuusuttunillu sumiginnagaasunik annertuumik sullissinerannut aammalu ajornartorsiutip ersersinneqarnissaanut suliniuteqarnerannut.
Nuummi inuusuttut Siuarsartut (NUIF): Kr. 10.000.
Sammisaqartitsinerpassuinut, taakkunani inuusuttut nammineerlutik inuusuttoqatiminnik sammisaqartitsinernik aaqqissuussisarput. Taamaaliornikkut inuusuttut allat sammisanut allaanerusunut, ilaatigut pinaveersaartitsinermik toraagalinnut inuttullu ineriartorfissamut periarfissalinnut ornigukkusulersittarpaat
Nuummi kigutigissaasut peqatigiiffiat KIGUT: Kr. 10.000.
Kalaallit kigutigissaanermut ullorititaata ingerlanneqarnerani tunniusimallutik peqataanerannut, tassani sualummik meeqqat peqqissunik kiguteqarnissaat qitiutinneqarpoq.
Peter Christiansen, Nuuk: Kr. 5.000,00.
Piitap ukiuni arlalinni pualavallaarnerminut akiuussimanini aqqutigalugu inooriaatsini allanngortissinnaasimavaa. Ajornartorsiutit takusinnaasimavai ikiortissarsiorsimallunilu. Allanut siunnersuutaa pitsaasoq tassaavoq: ”piffissaagallartillu ikiortissannik ujartuigit”
Kullorsuarmi isiginnaartitsartut ”Pillegijaaq 99”: Kr. 5.000,00
Pilligijaaq nunaqarfimmi piumassutsimik peqataasunit atorneqartarpoq. Isiginnaartitsisartut isiginnaartitsigaangamik imminortarneq pillugu suliaqartarput aammalu ”Inuuneq pitsaasoq” sammisarlugu. Tamatuma saniatigut nunaqarfimmi unnussiuaartitsisarput, taakkulu ingerlanneqarsinnaanissaannut namminneq aningaasanik katersisarlutik, pisortatigoortumik taperneqarnatik.
Julie aamma Josef Løvstrøm, Qasigiannguit: Kr. 5.000,00
Aappariit ukiorpassuarni nammineq piummassusertik naapertorlugu Qasigiannguani meeqqanik inuusuttunillu sammisaqartitsisarnermik pilersitsisarput. Ilaatigut aamma Nuummi Katuami takutinneqarnikuusumik isiginnaarsitsinermik oqallisissiamik.
Atammimmi utoqqaat innarluutillillu peqatigiiffiat: Kr. 5.000,00
Sapaatip akunneranut ataasiarluni timigissarnissamut timimillu aalatitsinissamut aamma assassorluni aaqqissuussisarnernut neqeroorutit eqqanaarneqarnissaannik suliniuteqarnerannut. Ukioqqortugaluarlutik piumassuseqarluarlutik aaqqissuussinernik ingerlatsisarput.
Qaqortumi Tasersuup Atuarfiani 5. A: Kr. 5.000,00
Kigutiminnik ataavartussanik paarsilluarnermikkut naammassisaannut. Kigutigissaasut klassi nersualaarpaat 5 A’t ullut tamaasa kigutigissartarnerat pingaartuusoq oqaatigalugu.
Sabine Moritz, Ittoqqortoormiini peqqissaasoq: Kr. 5.000,00
Najukkami pinaveersaartitsinermi atatsimiititaliamik tunniusimalluarluni sulineranut. Illoqarfimmi suliniutinut arlalinnut siuttuuvoq.