Nick Nielsen K2-mukarpoq
Nick Nielsen maannakkorpiaq Himalayap qaqqarsuisigut 150 kilometerinik isorartussusilikkut ingerlaarpoq, K2-p 4.900 meterinik qatsissusilimmiittumut uningaartarfianukarluni.
Nick Nielsen Qasigiannguaneersoq nunarsuarmi qaqqat protunersaasa tullianut Pakistanip Kina-llu killeqarfianiittumut K2-mukarluni ingerlaarpoq.
K2 8611 meterinik portussuseqartoq majuarlugu ulorianarluinnartuuvoq, Mount Everestimit Nick Nielsenip 2005-imi qaqisimasaanit ulorianarnerulluni.
- Pissutsit eqqaassagaanni ajunngeqaaq, Nick Nielsen Pakistanimiit oqaluttuarpoq. Jakob Wetchep saniatigut aamma Ukrainemiut marluk ingiaqatigai.
Base camp-imukaarput, maannalu 3.000 meterinik qatsissusilimmiillutik 50 kilometerit ingerlareerpaat. Base Camp 4.900 meterinik qatsissusilimmiippoq. Qaqqarsuaq tikitsinnagu nunaqarfimmit kingullermiit Base Camp-imut 150 kiloeterinik isorartussuseqarpoq. Nunaqarfeeraq Askole-mik ateqarpoq.
- Ingerlaarneq sakkortuvoq, Mount Everestimukarnitsinnit tannerujussuulluni. Aqqutissaq assut aqqulluttoq ingerlaarfigalugu assut takivoq, Nick Nielsen oqarpoq.
Eqqiluisaannginneq kisiat ajornartorsiutigaat, naarlullutik timmiimalersimagamik.
- Muhammedimik titartakkat pissutigalugit ajornartorsiuteqalersinnaanerput ernummatigigaluaratsigu. Kisianni maani qaqqarsuit akornanni malunnartorsinngilagut. Akerlianik sumi tamaani inussiarnissaarneq tikilluaqqusaanerlu nalaattarparput. Aamma Inuit Kalaallit Nunaat pillugu tusagaqarusuttuupput, Nick Nielsen oqaluttuarpoq.
Nickip ilisimatitsissutigaa Base Campimiit K2-p qaavanukarneq qaammammik ataatsimik sivisussuseqartoq, taamaattumik juulip naajartornerani aatsaat qaqqarsuup qaavaniilersinnaanissartik naatsorsuutigaa.
- Kisianni nukivut naammassanersut apeqqutaassaaq. K2 qaqisinnaanngikkutsigu Broad Peakikkut nunarsuarmi qaqqat portunersaasa normu 11-iatigut majuarnissarput anguniassavarput, Nick Nielsen oqarpoq.