Skip to main content

Kinguartitsineq taamaatiinnarnerlu - aamma

Air Greenlandip juullilernerani decembarip 21-iani immikkut timmisartuussinissaralua decembarip 22-ianut kinguartinneqarpoq, aammalu Nuummiit Kulusumut timmisartuussinissat pingasunngormat taamaatiinnarneqarlutik.

Air Greenlandip Boeing-ia Kunuunnguaq pingasunngornermi decembarip 19-ianili Narsarsuup Københavnillu akornanni timmisartuussisussaagaluartoq ullut kingulliit teknikkikkut ajornartorsiuleqqavoq. Tallimanngorpat piariissangatinneqarpoq, ilaasussat ulluni marlunngortuni Narsarsuarmiit Københavnimiillu aallartussaagaluit apuuffissaannut apuunniassallugit.

Ullut juullip tungaanoortut ukiumi ulapaarfiunerpaasarput, taamalu timmisartumik Kangerlussuarmut tallimanngormat timmisartuussisinnaasumik pissarsiniarneq iluatsinngortoorpoq, taamaattumik Air Greenlandi allatut ajornartumik arfininngornermi decembarip 22-iani timmisartuussisariaqalersimavoq, timmisartuutileqatigiiffiullu nammineq timmisartuutini Boeing atortariaqarlugu. Tamanna Danmarkimiit ilaasussanut 100-it missaanniittunut Kalaallit Nunaannilu ilaasussanut 60-it missaanniittunut eqquissaaq.

Københavnimiit aallassaaq arfininngornermi decembarip 22-iani danmarkimi nal. 07.15, kangerlussuarmut tikilluni kalaallit nunaanni nal. 07.55. Kangerlussuarmiit aallassaaq ulloq taanna kalaallit nunaanni nal. 09.10, Københavnimut tikilluni danmarkimi nal. 17.30.

Kulusumi suli silarluppoq

Air Greenlandip pingasunngormat decembarip 19-iani Nuummiit Kulusumut timmisartuussinissaralua tunumi silarlunnera pissutigalugu taamaatiinnarneqarpoq. Taarsiullugu arfininngorpat decembarip 22-iani timmisartuussinerit marluk ingerlanneqassapput, ilaasussat tamaasa juullertinnagu apuussinnaanissaat qularnaarniarlugu.

Juulleriartornerani ullut ulapaarfiunerpaasarput, taamaattumik sila ilanngulluni akornutaaleraangat immikkut timmisartuussisinnaanerit aamma eqqorneqartarput.

Juullip tungaannut sapaatip akunnera una timmisartut tamaasa inuttallu tamaasa atorlugit inuit apuuffissaannut sapinngisamik piaarnerpaamik apuunniarneqassapput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER