Ujarassiorit 2007-imi ajugaasut
Ujarak ajugaassutaasoq Nuup Kangerluani nassaarineqarpoq, qaarsunulli atasuunngimmat imaassinnaavoq allamiit tassunga pisimasoq.
Ujarassiorit 2007-imi nuna tamakkerlugu ujaqqerituunut kikkunnulluunniit ujarassiortitsineq maanna naavoq. Ujaqqat misissugassat 840-t, taakkunannga 251-it misissoqqinneqartussatut ingerlateqqinneqarsimapput.
Ujarak Nuup eqqaaneersoq nassiunneqarsimasoq ersittumik gultertalik ukiormanna normu 1-itut akileraarutitaqanngitsumik 55.000 koruuninik akissarsissutigineqarpoq. Qaffasissorujussuarmik gultimik akoqarnermi (0,7 % miss. gultertalik) saniatigut aamma sølv-imik, aqerlumik, zinkimik, kanngussammik, mangamimik, kviksølvimik arsen-imillu akoqarpoq.
Ujarak ajugaassutaasoq Nuup Kangerluani, taama ittumik ujaqqamik nassaarfigineqarnikuunngitsumi, nassaarineqarpoq. Ujarak qaarsumut atasuusimanngimmat imaarataannaavoq ungasissumiit nassaarfigineqartumiilersimasoq, taamaattumillu nassaarfiusoq taamaattoqarfioqqissaartariaqanngitsoq.
Ujarak ajugaassutaasoq Nuummeersumit Rasmus Thomassen-imit nassiunneqarsimavoq. Taanna Aatsitassanut Pisortaqarfimmit 30.000 koruuninik GrønlandsBankillu Inuussutissarsiornermut Aningaasaateqarfianiit 25.000 koruuninik akissarsitinneqarpoq.
- Ukiormanna ajugaassutaasoq immikkut soqutiginaateqarpoq, tassami taama gultimik akoqartigisut qaqutigoorluinnartuummata. Taamaattumik una nassaaq aatsitassarsiorfiutileqatigiiffinnut soqutiginaateqassaaq, Aatsitassat pillugit Naalakkersuisoq Kim Kielsen oqarpoq.
Ajugaasup tulliatut 20.000 koruuninik akileraarutitaqanngitsumik akissarsisinneqartut Aatsitassanut Pisortaqarfimmit 12.500 koruuninik GrønladsBanken-illu Inuussutissarsiornermut Aningaasaateqarfianit 7.500 koruuninik akissarsisinneqarput. Ajugaasumut tulliusutut marluk toqqarneqartut ukuupput:
? Pele Maratse Kulusummeersoq Sermiligaap eqqaani ujaqqamik gultimik akoqarluartumik nassitsisimavoq.
? Mikael Jerimiassen Kangaatsiameersoq ujaqqamik Kangaatsiap eqqaaneersumik molybdæn-imik manga-imillu akoqarluartumik nassitsisimavoq.
Ajugaasut pingajuattut toqqarneqartut tamarmik akileraarutitaqanngitsumik 7.000 koruuninik Aatsitassanut Pisortaqarfimmit akissarsitinneqartut ukuupput:
? Enok Abelsen Tasiilameersoq ujaqqamik gultimik kanngussammillu akoqarluartumik Kulusuup eqqaaneersumik nassitsisoq.
? Malene Siegstad Ilulissaneersoq ujaqqamik saviminermik, lathan-imik gallium-imillu akoqarluartumik Oqaatsut eqqaaneersumik nassitsoq.
? Ole Vittus Lynge Nuummeersoq ujaqqamik korund-imik aligortalimmik safir-ikkunnut assingusumik Nuup eqqaaneersumik nassitsisoq.
Ajugaasut sisamaattut Aatsitassanut Pisortaqarfik akileraarutitaqanngitsumik 2.000 koruuninik ukununnga akissarsititsivoq:
? Louise Jacobsen Eqalugaarsunneersoq ujaqqamik gultimik kanngussamillu akugissaartumik nassitsisimasoq.
? Simujoq Nathanielsen Sermiligaameersoq ujaqqamik gultimik akugissaartumik nassitsisoq.
Ujarassiorit ukiuni 19-ini ingerlanneqarsimasoq tassaavoq nuna tamakkerlugu ujaqqerituunut kikkunnulluunniit ujarassiortitsineq inuillu ujaqqanik asimi nassaarisimasaminnik allakkerivikkut akeqanngitsumik ujarassiuunut sukumiinerusumik misissugassanngorlugit nassitsisinnaapput.