SIRIUS-i ukiaanerani nakkutilliilluni aallartippoq
Nakkutilliisut qimussersartut SIRIUS maannakkorpiaq ukiaanerani nakkutilliillutik aallarteruttorput.
Qimussinik angalanissat aallartinnissaat ukioq manna ullualunnik kinguartinneqarsimavoq, qaammatini arlalinni sikuniaataarneranik sakkortuumillu anoritalimmik silarloqattaarneranit peqquteqartumik. Kisianni novembarip 5-iani qimussersoqatigiit siulliit angalanertik aallartissinnaalerpaat, Kalaallit Nunaanni Sakkutooqarfik ilisimatitsivoq.
Ukiaanerani nakkutilliilluni angalanerit novembarimiit decembarip 22-iata tungaanut ingerlanneqassapput. Qimussersartoqatigiit nakkutilliillutik aqqutissaata isumartussusaa katillugit 6000 km-iupput.
Kalaallit Nunaata kangiata Avannaani kaperlak aallartereerpoq. Nakkutilliisut qimussersartut SIRIUS-ip qullersaqarfiani Daneborg-imi seqineq novembarip 9-ani kingullerpaamik takuneqarpoq. Tamatuma kingorna tamaani qaammatini pingasuni kaperlassaaq.
Nakkutilliisut qimussersoqatigiivi juulli ullualunnguit sioqqullugu Daneborg-imut apuunnissaat naatsorsuutigineqarpoq, taamaalillutik ataatsimoorlutik juullisioqatigiillutillu ukiortaarsioqatigiissinnaassammata. Taava januaarip naajartornerani nakkutilliisut qaammatini tallimaat avillugu sivisussusilimmik upernaakkut nakkutilliinertik aallarnissavaat.