Skip to main content

Qilalukkat qernertat qaqortallu satellitsikkut aallakaatitsissutilinnik nalunaaqutsersorneqarput

Pinngortitaleriffiup qilalukkat qernertat qaqortallu satellitsikkut aallakaatitsissutilinnik nalunaaqutsersorpai Niaqornani illu sullivittaaq aallaavigalugu

Pinngortitaleriffiup Niaqornani Uummannap pigisaani, illu type Illorput 82 aaqqissuuteriarlugu najugaqarfittut sullivittullu atoqqaarfissiortippaa 1. november 2007.

Biologit Niaqornat aallaavigalugit piniakkat avatangiisillu piffissami sivisunerusumi misissuiffigisinnaalerpaat. Pinngortitaleriffiup sullivittaarnermigut piniartut biologillu suleqatigiinnerulersinnaanerat neriuutigaa, aammalu biologit suleriaasiinut piniartullu atugaannut paasinninneq annertunerulerumaartoq, Pinngortitaleriffik nalunaarpoq.

Suliatut siullertut qilalukkat qernertat qaqortallu qassutinik pisareriarlugit satellitsikkut aallakaatitsissutinik nalunaaqutsersorneqarput. Qassutit qanittuani qilalugaqarnersoq nalunaarsorniarlugu puttaqutit naalaartaatillit ikkussorneqarsimapput. Naalaartaatit qilalukkat nipaat illu sullivimmi computerimut ingerlaartittarpaat, taamaalilluni sumiiffik taartillugu aamma nakkutigineqarsinnaasunngorlugu. Maanna piniartut biologillu suleqatigiillutik qilalugaq qernertarsuaq angutiviaq satellitsikkut aallakaatitsissusersimavaat. Pilersaarutaavoq qilalukkat arlallit nalunaaqutserneqassasut.

Biologit siunnersuinissaminnut pisariaqartippaat uumasut amerlassusaat nunatsinnilu sumiinneri ilisimassallugit. Uumasoqatigiit amerlassusaasa paasiniarnerani satellitsikkut aallakaatitsissutit timmisartukkut kisitsinermut tapertarineqartarput. Satellitsikkut aallakaatitsissutigut qilalukkat ukiivigisartagaat neriniartarfiilu paasineqarsinnaapput (qilalukkat Uummannap eqqaaniittartut Qaanaallu kangerluaniittartut imminnut atassuteqarnerat ilimanaateqarpoq).

Avannaa Imaani sikumi allannguutaasinnaasut ingammik Qeqertarsuup Tunuani Uummannallu eqqaani annertunerpaassapput, taamatullu qilalukkat ingerlaartarnerisa allanngornerinik kinguneqartussaalluni. Qilalukkat aallaakaatitsissutillit ikiortigalugit aamma Avannaa Imaani ukiup ingerlanerani immap nillissusaa nalunaarsorneqarsinnaavoq. Qilalukkat ullormut arlaleriarlutik aqqartarput, immallu itissusaanit assigiinngitsunit nillissutsimut paasissutissat satellitsikkut aallakaatitsissutigut Pinngortitaleriffimmut nassiunneqartarput.

Aamma satellitsikkut aallakaatitsissutit atorlugit paasineqarsinnaavoq qilalukkat upernaakkut ukiakkullu ingerlaarnerminni uuliaqarfissat aqqusaartassaneraat, siunissami Avannaa Imaani (Baffin Bugt) ingammik Qeqertarsuup Tunuata avataani avannaanilu uuliasiorfinngorsinnaasunik sunniivigineqarsinnaammata, Pinngortitaleriffik nalunaarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER