Rektoritut atorfimmut qinnuteqartut ikippallaartut
Nuummi GU-mi rektoritut atorfik inuttassarsiuuteqqinneqassaaq, amerlanerusut qinnuteqarnissaat neriuutigalugu.
Nuummi Qeqqata Ilinniarnertuunngorniarfiani rektoritut atorfimmut qinnueqartoqarpianngilaq. Taamaattumik atorfik inuttassarsiuuteqqinneqassaaq, Namminersornerullutillu Oqartussat neriuutigaat siullermik inuttassarsiuussinermit sisamanik qinnuteqartunit amerlanerusut qinnuteqassasut. Taamatut paasissutissiivoq KIIIP-mi, Kulturimut, Ilinniartitaanermut, Ilisimatusarnermut Ilageeqarnermullu PIsortaqarfimmi immikkoortoqarfimmi pisortaq Andreas Olsen.
– Atorfik inuttassarsiuuteqqissavarput qinnuteqartut amerlanerunissaat neriuutigalugu, Andreas Olsen Sermitsiaq.gl-imut oqarpoq.
GU-mi rektoritut atorfik maanna inuttassarsiuunneqarpoq pissutigalugu maanna rektoriusoq Margit Motzfeldt aappaagu martsimi soraarninngussammat.
Atorfik nanoq.gl-imi inuttassarsiuunneqarpoq.