Qimarnguiit siulittaasuata kinaassutsiminnik isertuussisunik nalunaartartoqalernissaa kaammattuutigaa
Amerlanerusut kinaassutsiminnik oqaatiginnittussaasuunngikkaluarunik nakuusertunut nalunaarutiginninnissaminnut sapiinnerulissagaluarput, qimgarnguiit siulittaasuat isumaqarpoq.
Ullumikkut novembarip 25-iat arnanut nakuusertarnermut akerliunermi nunarsuaq tamakkerlugu ulloraa. Kalaallit Nunaanni qimarnguiit ukiumut 1000-it missaannit qimarnguigineqartarput. 2006-imi eqqornerusumik 1083-it saaffiginnissimapput, taakkunganna arnat 706-iullutik, meeqqat 342-t angutillu 38-it, knr.gl allappoq.
Kisitsisit taamaaruusarnerannut peqqutaasunut ilaavoq, saaffiginnittartut ilaat ukiut tamaasa uteqqittuartuusarmata, Regine Enoksen, Kalaallit Nunaani Qimarnguit siunnersuisartut kattuffianni siulittaasoq oqarpoq. Taanna isumaqarpoq, innuttaasut ataatsimut isigalugu namminneq qanoq iliuuseqarnissaminnut tunuarsimaarpallaartut.
–Innuttaaqataalluta arlaannik tusagaqarutta nalunaartussaatitaavugut. Kisianni uanga misigereerpara inuit inoqatitik allat unnerluutigissallugit tunuarsimaarfigisaraat, pissutigalugu imminnik unnerluutiginnittuunertik unnerluutigisaminnit paasineqaratarsinnaanera ersissutigisarmassuk. Taamaattumik isumaqarpunga atigisaq oqaatiginngikkaluarlugu nakuusernerit nalunaarutigineqarsinnaasariaqartut, Regine Enoksen oqarpq. Taassuma aamma uparuarpaa, angerlarsimaffimmi nakuusernerup sammineqanngippallaarnera peqqutaasunut ilaasoq.
Danmarkimi arnat siornagumut sanilliullugu ikinneerarsuit maannakkut aapparminnit aappakuminniilluunniit nakuuserfigineqartarput, Jyllands-Posten allappoq. Naligiissitaanermut ministeriaqarfimmit nalunaarusiaq nutaaq naapertorlugu aapparisamut nakuusertarnerit 2000-imi ukiumut 40.000-iniit 2005-imi 30.000-inut ikileriarsimapput.
- Ikileriaat annertoorujussuuvoq, nalilerparput arnat nakuusernermit eqqorneqartut taamaaliorfigineqarnissamilluunniit sioorasaartissimasut ullumikkut siusinnerusukkut qisuariartalersimasut. Arnat ullumikkut nalunngilaat ikiortissarsiorsinnaallutik, Naalagaaffiup Peqqissutsimut Ilisimatusarfiani ilisimatuut pisortaat Karin Helwig-Larsen ministeriamut nalunaarusiortuusimasoq oqarppoq.
Ukiuni kingullerni kalaallit nunaanni qimarnguiit arnat nakuusernermit aniguisimasut amerleriarsimanerat malugisimavaat.
- Arnat siunnerfeqarnerulersimanerat takusinnaasimavarput. Taamaattumik isumaqarpunga nakuuserneq taamaaliornerullu kinguneri pillugit oqallinnerulertariaqartugut. Aamma Pingaaruteqarpoq, eqqugaasunit imminermit assersuuteqarnissaq, aammalu pissutsit angerlarsimaffimmi oqaluuserineqartariaqartut, knr.gl naapertorlugu Regine Enoksen oqarpoq.