Inatsit isornartoqartoq eqqarsaatigilluagaananilu
Inatsisartut Ilimmarfik pillugu inatsit akuersissutiginninnerat Ilinniartut suleqatigiissitaata assut naammaginngilaat.
– Suli isumaqarpugut inatsit isornartoqartoq aamma eqqarsaatigilluagaanngitsoq, aammattaaq aaliangiineq aasaanerani ataatsimiinnermut imaluunniit ukiaanerani ataatsimiinnermut kinguartinneqartariaqarsimagaluartoq, taamaalillutik susassaqartut tamarmik periarfissinneqarsimassagaluarput iluamik tusarniaavigineqarnissaminnut, ilinniartut allapput.
– Taamatullu tassanngaannartumik tallimanngornermi aggeqquseriasaarnermik pisussanngortumik pisoqarsimanera akuerineqarsinnaanngilaq, ukulu ilinniartut sinnerlugit ilinniartoqarfinneersut aggersut taakkuusimannginnerlutik saaffigineqartutuaasimasut aggertussatut ilinniartoqataasullu tamarmik periarfissinneqaratik ilisimatinneqaratillu aggeqqusinermik.
– Piffissaq tamaat KIIIP-imiit aamma Naalakkersuisuniit imminnut assortuuttunik oqaaseqaatinik pisarsimavugut. Kissaatigaat universitetimi demokratiip atorneqarnissaa, kisianni tamatumunnga ilutigitillugu siulersuisussat politikerinik toqqarneqartussat akueralugit taasillutik, maannakkut universitetip ingerlariaasiani demokrati tunngavigineqartoq akerlilerlugu.
Aallaqqaataaniilli Ilimmarfik pillugu siunertaq imaappoq:
- Ilisimatusarnermik ingerlatsineq nunarsuaq tamakkerlugu naleqqersuussinaasoq
- Nukiit katersuuffiat pilersinneqassaaq ilaatigut ilisimatusarnermik ingerlataqartut nunanit allaneersut ilinniagaqartullu Nunatsinnut aggersinnaaqqullugit taamaalilluni avataaniit pissarsiaqartoqarniassammat
- Kalaallit qaffasissumik ilinniagallit pigilerumallugit.
– Pingasunngormat aalajangiineq anguniakkanut taakkununnga assortuuppoq, tamatumani pissutaavoq pisortaasussat piumaffigineqannginnerat. Uggornarpoq Inatsisartut qunugimmassuk namminersornissamut aqqutissap qulakkeernissaa – tassa qulakkeerlugu Nunatta innuttani ilinniartissagai piginnaaneqalersillugit aamma unammillersinnaanngortsillugit nunami maani aamma nunarsuaq tamakkerlugu, ilinniartut isumaqarput.
Ilinniartut suleqatigiissitaata massakkumiit siulersuisut kiisalu rektoritut, rektorip tullersortaatut aamma instituttini pisortatut atorfiit inuttalerneqarnissaat sukumiisumik isornartorsiortumillu isigalugit malinnaaffigilluassavaat.