Skip to main content

Juullip inua Paamiunut tikimmat

Mittarfik arfininngormat ualikkut ammarneqarmat illoqarfiup innuttai 250-it timmisartumut ilaapput.

Air Greenlandip Paamiuni mittarfimmut arfininngormat ullup-qeqqanut timmisartoqaarnerani ilaasoq siullerpaaq tassaanngilaq inatsisartut siulittaasuat imaluunniit naalakkersuisunut ilaasortat.

Nioqqaartorli tassaavoq juullip inua, Ludvig Ringsteditut isikkulik, tikilluaqqullugu ersaattaanneqarluarpoq.

Tassunga tulliullutik aatsaat niupput naalakkersuisunut ilaasortat Kim Kielsen, Finn Karlsen amma Arkalo Abelsen, inatsisartut siulittaasuat Jonathan Motzfeldt, borgmeseriusimasoq kommunillu kattuffianni siulittaasuusimaoq Anders Kielsen kiisalu atorfilittat Nuummiillu tusagassiortut.

Juullip inua mittarfeqarfiup timmisartunut eqqussisarfiani meeqqat mamatuaagassaannik agguaatillugu illoqarfiup innuttaat 250-it timmisartorput. Air Greenlandi illoqarfik qulaavaallugu tallimariarluni timmisartuussivoq, ammaanersiornermi illoqarfimmut tunissutigalugu, ilaasullumi amerlasuut timmisartumut suluusalimmut ilaallutik aataavissuaq timmisartorput.

Paamiuni timmisartuusseqqaartoq tassaavoq Air Greenlandip timmisartuutaa "Minniki", inuttaapput: kaptajn Niles Peter Lukkasse, aquttoq Jakob Mølgaard aamma timmisartumi saqisut Maren Louise Poulsen aamma Sussi Petersen.

Aqqummi Nuuk - Paamiut sila pitsaavoq: Avannaannguarluni, qutsissunik nuialluni, isikkivigilluni issisiullu 0 grademiilluni.

»Minniki« Paamiunut mippoq nal. 12.20, taamalu illoqarfiup oqaluttuarisaanera nutaaq aallartilluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER