Nordön usingiarlugu naammassilerpaat

Amigaatigineqartut tassaapput containerit 60-it missaat . Usiisa ilaat annertuumik ajoquserneqarsimapput umiarsuullu usingiarneqarnera pisarioqaaq piffissarlu annertooq atorneqarpoq.

Usit ajoqusersimasut ilaat taama isikkoqarput.

Royal Arctic Linemi naatsorsuutigineqarpoq umiarsuaq attartugaq 'Nordön'-ip usingiarneqarnera sisamanngornermi unnukkut naammassineqassasoq. Usit nakkakaasimapput containerillu amerlasuut ima ajortissimatigipput lastimit peerneqarsinnaanatik nalinginnaasumillu kivinneqarsinnaanatik. Tamatumunngalu ilutigitillugu containerit allerpaajusut lasteqarfimmi 1-imiittut ballasttankip putusimanera pissutaalluni imermiissimallutik.

Illoqarfinnut allanut pilersuineq kinguarsarniarnagu Arina Arctica Kujataanut aallartinneqarpoq, aammattaaq sisamanngornerup unnuaanut 'Irena Arctica' aallartinneqarluni, taassuma containerit Nördonimeersut aserorsimanngitsut Sisimiunut usillugit nassarpai.

Nassiussat containerini aserorsimasuniittut containerinut allanut issorarneqassapput kiisalu arfininngorneq decembarip arfineq pingajuanni naatsorsuutigineqarpoq Arina Arctica Nuummiit Maniitsumut, Sisimiunut, Qasigiannguanut aamma Ilulissanut ingerlaarluni aallassasoq, taassuma nassiussat Nördonimeersut sinneri usigissavai.

Powered by Labrador CMS