Mittarfiit pillugit Barfoedimut akissutit

Namminersornerusuni pisortap Olafur P. Nielsenip Nuummi mittarfik pillugu illussanik titartaasartup Peter Barfoedip oqaaseqaatai akissuteqarfigai.

Sermitsiap internetimi nittartagaani oktobarip 24-ianeersumi Nuummi Mittarfiup allineqarnissaanut periarfissa pillugit allaaserisat arlallit atuarneqarsinnaapput, soorluli illussanik titartaasartup Peter Barfoedip kangerlummi Nuullu mittarfiani anorit pissusaat pillugit oqaaseqaatai arlallit atuarneqarsinnasut.

Peter Barfoedip 2007-imi julip 24-iani timmisartuussineq aalajangersimasoq innersuuppaa, taamanikkut pisoq immikkut "navianartoq" pisimavoq, taamanikkut Dash-7 Nuummut mikkiartortilluni ajornartorsiulersimasutut taaneqarluni.

Julimi pisoq innersuussutigineqartoq taanna pillugu immikkut ilisimasallit ilisimatitsissutigaat ullormi pineqartumi tassani immikkut navianartumik pisoqarsimaneranik maluginiagaqartoqarsimanngitsoq, aamma taamatut oqartoqarsinnaanngilaq, timmisartuaqqat taamatut ajornartorsiulersinnaappata aamma timmisartut anginerumaat ajornartorsiulersinnaanerat eqqortuusoq.

Timmisartornermut tunngasuni immikkut ilisimasallit taamalu aamma ekspertit aamma ilisimatitsissutigaat ilaasut timmisartulluunniit navianartorsiortissinngatikkaanni soorunami timmisartuussinerit ingerlanneqarneq ajortut. Pisimasoq taaneqartoq taanna ilaasunut ataasiakkaanut ajorluinnartumik misigineqarsimasinnaasoq taamaalilluni Nuummi mittarfiup pioreersup tallineqarsinnaannginneranut tunuliaqutariniassallugu tunngavissaqanngilaq.

Peter Barfoedip piffissami sivisunerusumi Nuummi mittarfissamik aaqqiissutissatut nammineq siunnersuutini saqqummiuttarsimavaa. Tamanna unneqqarilluni suliaallunilu oqallinnermut nalinginnaasumut ilapertuutaavoq.

Nuummi mittarfiup atorsinnaajunnaaqqasarsinnaaneranut missingersuutaagallartut takutippaat ukiumut ullut 20-it atorsinnaasassanngitsoq. Tamanna Nuummi mittarfiup tallineqarnerata misilittagassarpassuisa ilangiinnarpaat.

Uangalu ilanngullugu ilisimatitsissutigisinnaavara, aasa Airbus 319-imik Kangerlussuarmiit Københavnimut timmisartornermi timmisartumik aquttup timmisartup qarasaasiaatigut takutimmagu Nuummi mittarfimmut 2.200 meterinut tallineqarsimasumut ajornartorsiutitaqanngitsumik mitsitsisuusaarneq.

Naggataagut oqaatigissavara Naalakkersuisut Inatsisartullu suliaq pillugu ilisimasaqartunit siumullu isummernertaqanngitsumik tunngaveqarlutik paasissutissinneqarnissaat assorujussuaq pingaaruteqarmat. Taamaattumik periarfissanut allanut tunngatillugu sulisunik immikkut ilisimasalinnik misissuisitsisoqarsimavoq, tassunga ilanngullugu kangerlummi anorip anoraasuaqattaartarneranut naatsorsuusiornerit.

Powered by Labrador CMS