Kalaallit Nunaat kræftimik toqquteqartarnermi rekordiliivoq
Nunanut avannarlernut allanut sanilliullugu Kalaallit Nunaanni kræftimi qoqquteqartartut agguaqatigiisillugu amerlanerujussuupput. Kisianni kræftimik nappaateqalersunit nutaanit kisitsisit Nunani Avannarlerni ikinnerpaanut ilaapput.
Kalaallit Nunaanni kærftimi toqquteqartartunit agguaqatigiisillugu kisitsisit nunanut avannarlermiunut allanut sanilliullugu qaffasinnerujussuupput, AG allappoq, taassumalu kisitsisit 2007-imut Nordisk Statistisk Årbog, Nunat Avannarliit Siunersuisoqatigiivinit saqqummersinneqartoq, innersuussutigaa.
Kisitsisit takutippaat 2004-mi 115-init sinnilaarlugit kræftimik toqquteqasimasut, kisitsisit taakku Kalaallit Nunaanni Kisitsisitigut naatsorsueqqissaartarfiup 2007-imut saqqummersitaasa kingullersaraat. Kræftimik nappaateqartut akornanni agguaqatigiisillugu toqusartut assersuutigalugu Savalimmiunit Sverigemiillu marloriaataat sinnerlugu amerlanerupput. Nunani taakkunani marluusuni inuit kræfteqalersartut ikinnerpaajupput taassuminngalu toqquteqartartut ikinnerpaajullutik, illuatungaatigullu Danmarkimi kræftimi toqquteqartartut amerlasuujullutik ukiumullu kræfteqalersartut nutaat amerlanerpaajullutik, AG allappoq.
Illuatungaatigut Kalaallit Nunaanni Nunani Avannarlerni tamani nutaamik kræfteqalersartut ikinnerpaajupput. Danmarkimi agguaqatigiisillugu Kalaallit Nunaannut sanilliullugu marloriaammik amerlanerusunik kærfteqalersarput.
Peqqissutsimut Pisortaqarfimmit nakorsap Flemming Stenzip oqaatigaa Kalaalllit Nunaanni attaveqaatit/angallannermi pissutit kræftimi toqquteqartartunik kisitsisaatit qaffasinnerunerannut peqqutaaqataasunut ilaasut.
– Peqqutaasut arlaqarsinnaapput. Qularutissaanngilarli nunami maani angallanninarnikkut/attaveqaatitigut pissutsit annertuumik peqqutaaqataasut. Soorunami Rigshospitalip eqqannguani najugaqaraanni nakorsartikkiartornissaq misissortikkiartortarnissarlu ajornannginneerarsuusartoq, Flemming Stenz AG-mut oqarpoq.