Skip to main content

Nunaminerals kuultisiorfimmik piginneqataajunnaarpoq

Kalaallit Nunaata kuultisiorfituaa Nalunaq maanna nunanit allamiuinnarnit pigineqalerpoq. Piginneqatigiiffiup Londonimi qullersaqarfeqartup Crew Gold Corporaionip akitiat tamaasa pisiarisimalerpai.

Kalaallit aatsitassarsiutileqatigiiffiutaata Nunamineralsip Kalaallit Nunaata kuultisiorfiutituaani Nalunami aktiaatini tunisimavai. Taamaalilluni Kalaallit Nunaata kujataani kuultisiorfik piginneqatigiiffimmit Londonimit qitiusumik qullersaqarfeqartumit Crew Gold Corporation-imit tamakkiisumik pigineqalerpoq. Kuultisiorfik 2004-imiilli piiaaffiulersimasoq maannamut 6 tonsit missaannik kuultiliorsimalerpoq, Ritzau allappoq.

Crew Gold Corporation piginneqatigiiffiuvoq ilaatigut nunanit avannarlermiunit tulunnillu piginneqatigiiffiusoq. Piginneqataasut annersaraat tuluit aningaasarsiornermut ingerlatsivissuat Goldman Sachs, aktiat 19,8 procentiinik piginneqataassuteqartoq. Svenskit Handelsbanken, Nordea aamma Danske Bank piginneqataasut akornaniipput.

Nunaminerals-ip ilisimatitsissutigaa, kalaallit kuultisiorfiutaanni Nunaminerals-ip nammineerluni ineriartortitseqataaffigisimasaani aktiaatini 17,5 procentiusut 13,3 millioner kronenik pissarsissutigisimagai.

Aktiaatit tuninerinut peqatigitillugu akiitsunut uppernarsaatit ernianullu tunngasut tamarmik naammassineqarput. Niuernerup tamarmiusup inerneraa Nunaminerals-ip ukioq naallugu akileraarutit suli peernagit 12 millioner kronenik isertitsisinnaanissani naatsorsuutigisinnaalermagu. Tunisinikkut Nunaminerals-ip ilaatigut Kalaallit Nunaanni kuultisiornerup aatsitassanillu allanik ujarlernerup sukaterneqarnerulernissaanut aningaasaqarnikkut toqqammavigisani nukittorsarpai. Kisianni aamma Kalaallit Nunaata kangiani Fiskefjordimi platinimik piiaasinnaanermut ineriartortitsinissaq pillugu piginneqatigiiffiup aatsitassarsioqatigiiffimmik angisuumik isumaqatiginninniarneranut nukittorsaataavoq.

Nunaminerals-imi siulersuisunut siulittaasoq Anton M. Christoffersen oqarpoq, kuultisiorfimmi aktiaatit tunineqarnerat periusissat eqqarsaatigalugit aalajangiineq pissusissamisoortuusoq.

- Pilersaarutip 1992-imiilli ineriartortinneqarnerani peqataasimavigut, taamaalillutalu aamma misissueqqissaarnermiit aatsitassanik piiaasinnaalernissaq tikillugu pilersaarusiornerup ineriartortarnerani misilittakkanik paasisanillu pingaarutilinnik pissarsiaqarsimalluta. Maanna nukivut uagut piginnaatitaaffigisatsinnut atorniarpagut, tassalu misissueqqissaarneq, Anton M. Christoffersen oqarpoq.

Nunaminerals Kalaallit Nunaanni kuultisiornerup aatsitassarsiornerullu iluani piginneqatigiiffiit pingaarnersaraat. Piginneqatigiiffiup piginnittuisa annersaraat Kalaallit Nunaanni Namminersornerullutik Oqartussat 43,2 procentinik aktiaatillit, aktiat 20,1 procentii Carsten Berger pisortaralugu Rudersdal A/S-imit pigineqarput, kiisalu aningaasaateqarfiup Lønmodtagernes Dyrtidsfondip 17,9 procentit pigalugit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER