Akitsuutit pissakinnernut eqquipput

Niuernermik Ilinniarfimmi ilinniartut siunnersuutigaat peqqinnartut akikillineqassasut.

Akitsuinermi kikkut eqqorneqarpat?

Tamanna ilisimasatsitut Naalakkersuisut imigassanut, sukkunut, mamakujunnut, sodavandinut tupanullu – naatsumik oqaatigalugu ”inuulluaatit” akitsorneqarput.

Isumaqarpugut Naalakkersuisut inuiaqatigiit ilaannut eqquinerlutitsisut. SIK naapertorlugu aningaasarsiallit eqqugaallutik, taakku nunatsinni aningaasarsiakinnerpaanut ilaapput. Ilaqutariit meerartallit utoqqalinersiallillu, aningaasarsiaqarnerminnik ilungersoreeqisut.

Ilisimasatsitut Kalaallit Nunaanni meeqqat amerlaqisut sumiginnaagaasuupput. Naalalakkersusisut oqartuarput ilaqutariit meerartallit atugaat pitsaanerulersissallugit, timitaliissanatilli. Ajorsiartuinnartumik atugaqalissallutik.

Iluaqutaanngilaq imigassat tupallu akitsorneqarpata, pisisartunit akit apeqqutaatinneqarneq ajormata. Pinngitsuugassaringamikkit meerartaannut tuttarput. Ilaqutariinnut ”inuulluaatinut” taaneqareersunut pinngitsoortitsisinnaangitsut meerartaannut kingunerlutitsisarpoq, aningaasaataat ikinnerulermata meeqqat nalinginnaasumik ulluinnarni pisariaqartitaannut, soorlu atisanut, kamippannut, atuarnerminni atortussaminnut, sunngiffimmi sammisaannut il. il. Taamaalilluni meeqqat atugaat ajorseriaateqassallutik. Malittumik inuunerlunnermik atugaqarneq unigani ingerlaannassaaq. Taarsiullugit nerisassat akikillineqarsimasariaqaraluarput.

Aningaasarisartagaat tunngavigalugit immikkoortitsisoqassappat, tamatumani ”pisuut” ”piitsullu” maannakkornit malunnaatilimmik pisooqarnerullunilu piitsoqarnerussaaq. Aningaasarsiakinnerit ”pisunit” aningasatigut eqqorneqarnerpaasarput. Sooruna ”pisuut” pineqarsimanngitsut? Soorlu uku akitsuuserfigineqarnerussallutik: umiatsiat, aqqusermut akitsuut, biilit, snescooterit il.il. Taakku akitsuuserneqarsinnaapput aningasassiaqqortunerilluunniit akileraarnerulernissaannik aamma atuutitsisoqalerluni, aningasarsiaqqortunerit akileraarnerusalerlutik.

Taamalilluni landkarsi aningasanik amerlanernik isertitaqarluassaaq – amigaarutinut matussusiisoqarluni.

Aamma usi; isumaqarpugut innuttaasut tamarmik assigiimmik naligiimmillu pineqarnissaminnut pisinnatitaaffeqartariaqartut – inissaqartinneqassallutik, suliffeqartitaallutik il.il. Taamaattumik Naalakkersuisunut ilaasortaasimasut ”unioqqutitsillutik” illusiatik soorunami utertittariaqarpaat. Utertitsinermi aningaasarpassuit meeqqanut sumiginnakkanut ilaqutaariinnullu aningaasarsiakitsunut atorneqassagaluarput.

Allatuupput Nuummi Niuernermik Ilinniarfimmi NI-1-mi ilinniartut

Louisa Schmidt, Ellen Kristiansen, Arnannguaq Møller, Eleonora Karlsen, Agathe Dahl Thorleifsen, Inuaraq Gedionsen, Thomas Hegelund, Anders Poulsen og Susanne Pike.

Powered by Labrador CMS