Skip to main content

NBC-ip Ilulissat toqqaannartumik aallakaatippai

Amerikamiut TV-qarfiat Ilulissanit ataasinngornermi ullu qeqqariartornerani toqqaannartumik minutsini 40-ni avatangiiserissaarnerunissaq pillugu aallakaatitsivoq,

NBC-ip nangeqattaartuliani ”Ends of Earth”, (Nunarsuup kaaviffia) sapaammi aallakaatippaa. Ilulissanit ullumi aqagulu ullaakkut toqqaannartumik sivikitsumik Hotel Arcticimit aallakaatitsisoqassaaq.

Toqqaannartumik aallakaatitsinissamut ”takoqqusaarut” minutsini marlunni sivisussuseqartoq USA-mi tv-ni aallakaatittakkani nuannarineqarnerpaat ilaata, NBC-mi Sunday Night Football, unillatsiarnerani takutinneqarpoq, unnuk taanna 17 milliuninik isiginnaartoqartoq, GTE allappoq.

Illoqarfimmik iluliarsualimmik ilisarinnititsiarneq ataasinngornermi marlunngornermilu toqqaannartumik aallakaatitsinissanut aallarniutaavoq. NBC minutsini 40-ni sivisussusilimmi Ilulissaniit ulluni taakkunani aallakaatitsissaaq. Nunarsuup ilaani aamma kiatsikkiartuinartunit, Ecuadorimit sikuiuitsoq kujallermiillu minutsini 40-ni sivisussusilinni aamma aallakaatisisoqartassalluni.

Amerikamiut tv-qarfissuat avatangiiserissaarnerunissamik pingaartitsisumik sapaatip akunnerani matumani, Ilulissaniinnermi nalaani aallakaatitsivoq, ”Green is Universal” qulequtaralugu. CO2-mik aniatitsinnginnerunissamik kiisalu inuit nukissiuutinik atuipilunnginnerunissaannik siunertaqarluni aallakaatitsisarluni.

NBC-ip aallakaatitsinermi The Today Showimi ingerlatitsisua tusaamasarsuaq Matt Lauer isiginnaartartuminut Iluliarmiut Kalaallillu Nunaat ilisarititsisuutinniarlugu Ilulissanut aallartippaa, aamma avatangiisit pillugit tusagassiortuunertik Anne Thompson Ilulissiartillugu. TV-iliornermik suliallit katillutik 27-upput.

Aallakaatitassiornermi pisortaq iluaalliulileraluarpoq Lauersip immikkut timmisartumik attartugaa King Air Kangerlussuarmit arfininngormat tikinngitsoormat, timmisartoq ambalanceutigalugu atorneqarmat. Tikipporli, sapaatiummat ullu qeqqariartornerani tikilluni. Tikiinnarluni S-61-mik sermersualiarpoq tappavani immiussissalutik.

Kalaallit Nunaanni Takornariaqarnermi Inuussutissarsiornermilu Siunnersuisoqatigiinni ataqatigiissaarisup Nini Biilmannip NBC-meersut sapaatip akunnerini kingullerni marlunni suleqatigai. Isumaqarpoq toqqaannartumik USA-mut aallakaatitsisarnikkut Kalaallit Nunaata akeqanngitsutsiarsuarmik oqaluuserineqarnini iluaqutigilluakutsuussagaa.

- Aallakaatitassiat takutinneqarnissaannut siunertaavoq ilisimariillualigarput ajornartorsiutaalersorlu, tassalu nunarsuatta kiatsikkiartornera. Aallakaatitsinermi Kalaallit Nunaanni misigisaasinnaasut, soorlu kulturi pinngortitarlu aamma ilanngutassiaqarineqartarput. Tamanna takornariartitsinermut tuniniaanissamut, pilerisaarinermut atorluarsinnaakutsoorpoq, Nini Biilmann Ilulissanit oqaluttuarpoq.

Aallakaatitassiornermi pisortaq Karly Bacher naapertorlugu NBC-mut ataasinngornermi marlunngornermilu ullup qeqqariartornerani isiginnaartut 8 milliuniunissaat ilimagineqarpoq, aallakaatinneqassallutik nalunaaqutaq 8-mit 10-mut, nunatta nalunaaqutaa naapertorlugu 9-11-mut aallakaatinneqarlutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER