NBC ullut aappassaanni Ilulissani
NBC-ip ullumi aallakaatitassiamini Nuummi assilisanik takutitsivoq, qimussertunik, sermersuarmi tupertunik Ilulissaniillu toqqaannartumik assilisanik. Assilisat ilaat tassaallutik meeqqerivimmit umiarsualivimmiillu ulapaarfiusumit.
Amerikamiut tv-qarfissuat NBC Kalaallit Nunaata nalunaaqutaa naapertorlugu nalunaaqutaq 9-11 aallakaatitsivoq, aallakaatitsinermi Ecuadorimit Qalasersuaq Kujallermit aamma ilanngutassiisoqartarluni, taakkunanit aamma aallakaatitsisoqarluni.
Nini Biilmann Kalaallit Nunaanni Takornariaqarnermi Inuussutissarsiornermilu Siunnersuisoqatigiiffimmeersoq, GTE, aallakaatitsinermi Matt Lauerimik apersorneqartut siulliit ilagaat.
Hotel Arcticip eqqaani iluliarsuit tunuliaqutigalugit apersorneqarpoq. Apersorneqarnermi ilaani aperineqarpoq Kalaallit Nunaanni oqaluttuani suna ilisimaneqarluarnerpaanersoq.
Nini Biilmann qungujulaqaluni Kalaallit Nunaat pillugu takorloorneqartartunik oqaluttuarpoq, soorlu sermersuup Kalaallit Nunaat tamaat ulisimanngikkaa, nannut illoqarfinni nunaqarfinnilu aqqusinerni angalaneq ajortut. Biilmann aamma oqaluttuarpoq Kalaallit Nunaat aasami qorsoqqilluartarmat, tamannalu amerikamiunut takornariartunut takutitassaqqissoq.
Erseqqissaavorlu Namminersornerullutik Oqartussat GTE-llu soqutigisarinngikkaat Kalaallit Nunaat takornariarpassuarnik tikinneqartarnissaa, pingaartuusorlu takornariartut tassaassammata Kalaallit Nunaata nammassinnaasai.
TV-qarfiup aallakaatitami qulequtitaritaasoq, nunarsuup kiatsikkiartornera ilassuteqarfigalugu Matt Laur The Today Showip isiginnaartuinut 8 millionit missanniittunut oqaluttuarpoq Qeqertarsuup Tunua ukiuutillugu sikuusarunnaarsimasoq, ukiut 10-15-it matuma siorna sikuusarsimalluni.
Ullumi aallakaatitsinermi Nuummi assilisanik aamma ilanngutassiisoqarpoq. NBC oktobari naalersoq Nuummiippoq. Aamma qimussertunik, sermersuarmi tupertunik, Ilulissaniillu toqqaannartumik assilisanik aamma ilanngussaqarluni, ilaatigut meeqqerivimmit umiarsualivimmiillu ulapaarfioqisumit ilanngutassiisoqarluni.
Illoqarfiup angutitaasa ilaat tanngassimaarpoq minutsini 15-ni aallakaatitsinermi tusaamasanngorami, tassami Matt Lauer toqqaannartumik aallakaatsinerani oqaloqatigigamiuk. Ajortumilli pisoqarani qujungalanermilli nuannarsaaqatigiinermillu kinguneqarmat.
Amerikamiut avammut paasititsiniutinik suliffeqarfiisa ilaata GTE-mik suleqatigineqartup maannakkut naatsorsuleruttorpaa Kalaallit Nunaata aallakaatitsinermi peqataanerata oqaluuserineqarnerata aningaasanngorlugu nalinga. Millionerpassuarnik naleqassasorineqarpoq – amerikamiut dollarinik.