Peqatigiiffik tapersersuisoq itigartivinneqanngilaq
Nuup Kommuneani isumaginninnermut pisortap Vibeke Møller-Jensenip oqaatigaa, peqatigiiffik 2008-mi januarimi isumaginninnermut ataatsimiititaliap misileraatitut kontuanit aningaasanik qinnuteqarsinnaasoq.
Kinguaassiuutitigut atornerlunneqartunut peqatigiiffik tapersersuisoq Nuup Kommuneanit itigartinneqarsimanngilaq. Taamatut kommuni erseqqissaavoq, peqatigiiffiup siulittaasuata ullumi siusinnerusukkut sakkortuumik isornartorsioreeraalu, kommunip peqatigiiffimmik tapersersuiumannginnera.
Tamanna eqqunngilaq, kommunip isumaginninnermut pisortaa Vibeke Møller-Jensen oqarpoq.
- Isumaginninnermut immikkoortoqarfiup peqatigiiffik ataatsimiinnermut, oktoberip 26-ianni ingerlanneqartumut, qaaqqusimavaa, tassani aningaasat inillu oqaluuserineqarlutik. Immikkoortoqarfik nuna tamakkerlugu peqatigiiffinnut, Nuummi innuttaasunut sammitinneqartunut, aningaasatigut tapiissuteqarnissaminut periarfissaqanngilaq, allatigulli tapersersuinissamik neqerooruteqarsimalluni. Tassaasinnapput ininik atugassaqartitsineq, katsorsaasartunik tarnillu pissusiinik ilisimatuunik ilisimasalinnik taarseeqatigiinneq,kiisalu suliniutinik soorlu Ilaqutariinnik siunnersuinermik suleqatigiinneq, Vibeke Møller-Jensen allappoq.
Isumaginninnermut pisortaq naapertorlugu ataatsimiinnermi isumaqatigiissutigineqarsimavoq peqatigiiffik januar 2008-mi isumaginninnermut ataatsimiititaliamut suliniumminik saqqummiussisinnaasoq, siunertaralugu isumaginninnermut ataatsimiititaliap misileraammik kontuanit aningaasanik qinnuteqarnissaq.