Skip to main content

Ilinniartitsisut suli akerliupput

Ilisimatusarfik pillugu inatsit nutaaq ajorpoq, Ilisimatusarfimmi ilinniartitsisut ataatsimoorlutik atuartartut allagaannut allagaqarput.

Ilisimatusarfik pillugu inatsit nutaaq ajorpoq

Januarimi 2008 ilinniarfiit arlallit – aamma uppernaasaalluni ilinniarfiit Ilimmarfimmut isertissapput.

Sulisut ilinniartullu Ilisimatusarfimmi allineqarsimasumi atuartitsivinnut nutaanut naleqquttunullu avatangiiserissaarlunilu ilisimatusarfimmut, fagillu assigiinngitsut iluaqutaasumik pissarsiaqaataasumillu suleqatiginissaannut qilanaarisimaqaat.

Ajoraluartumilli aqutsineq pillugu inatsisissap aappassaannerlugu oktobarip 24-ani 2007 oqaluuserineqartup inernerissavaa universiteti tamakkiinngitsumik naammassisaqartartoq, Ilisimatusarfimmi kandidatinngorlutik naammassisimasut apeqquserneqartalerlutik nunat tamat akuerisaannik universitetini ilinniarsimasutut angusaqarsimanersut.

Ilisimatusarfik univisitetitut 1989-mi naqissuserneqarpoq, nunarsuarmi universitetit allat taassuma kingorna suleqatigineqalerlutik, taamaalilluni universiteti akuerisaasusutut pimoorusissutullu isigineqarluni.

Ilisimatusarfik suleqatissaalluartutut isigineqartarpoq, ilinniarfiuvorlu nunanit allaneersut ilinniarusullutik ornikkusuttagaat. Eqqaasissutigissavarput Ilisimatusarfik Inuit Insitutitut taaguuteqarluni ukiut 25-unngitsuulluunniit matuma siorna pilersinneqarmat. Tamatuma nalaani takorloorneqanngilluinnarpoq kandidatinngortoqartassasoq. Ilinniarnertuut amerliatuaarusaarsimapput, ilinniartut ukiuni kingullerni tallimani marloriaatinngorsimallutik. Piffissaq apeqqutaaliinnarpoq, naatsorsuutigisatsinniillu kalaallinik ilisimatuutut piffissami ungasinngittumi misissuisartoqalissaaq ilisimatuullu amerlissallutik. Taakku ullumikkut ilisimatuutut misissuillutik sulisut ilaannut kingoraartaasussanngussapput. Ilisimatuutut misissuillutik sulisut amerlanersaat kalaaliunngillat. Inatsisartut Naalakkersuisullu sulissutigisartik ulapputigingaaramikku aallarnisarnissamut ikaarsaariarnissamullu piffissaqartitsisoqanngilaq. Aqutsisutut atorfiit kalaallinik sukkanerpaamik inuttalernissaat isumagineqarluni rektor, prorektor insituttimilu pisortaq naliginnaasumik ilisimatusarlutik misissuisarnissaannut atorunnaarsitsisoqarniarluni. Universiteti ilisimatusarluni misissuinissarnissamut pisariaqartitsineranut unititsissaaq. Taamaalilluni nunat tamat akuerisaannik tunngaveqarani universitetinngussaaq. Universitetivittut akuerineqarnissamut tunngavissaqarunnaarluni. Ilisimatusarfik pappiliaannartigut universitetiussalluni. Naalakkersuisuni ilaasortap Tommy Marøp pisariaqavissumik ikaarsaariarnissamut piffissarititaasoq atoqqunianngingaaramiuk inatsisartut kulturimut ilinniartitaanermullu ataatsimiititaliaanut tunngavilersuisimavoq Ilisimatusarfiup ukiuni tallimani arfinilinni ikaarsaariarnissaa demokratiskimik tunngaveqanngitsoq ilinniakkanillu allanik ilinniartut Ilisimatusarfiup aqutsuisuini sinniisuutitaqaqqunngilai Ilisimatusarfimmullu akuliusimateqqunagit. Tamanna paasisinnaanngilarput. Ilisimatusarfik siunnersuuteqarpoq universiteti tamarmiusup atorsinnaasaanik utaqqiissaagallartumik universitetrådimik pilersitsisoqassasoq. Taanna atuutissaluni siulersuisut piareernissaasa tungaannut. Taama siunnersuuteqarpugut naalakkersuisut siunnersuutiminni taamaattorpiamik aamma siunnersuuteqarmata. Ilisimatusarfik isumaqarpoq siulersuisut ukiumi ataatsimi piareersimassasut Naalakkersuisulli sualuttumik isumaqarlutik qaammatit marluinnaat ingerlaneranni tamanna piareersimasinnaasoq, tassa assigiinngissutigineqartoq. Demokrati assigiinngitsinerlu pineqarpata qaammatit marluk qaammatillunniit 12-it suuppat, tassa takujuminaatsoq. Paasiuminaatsipparput sivisunerusumik ikaarsaariarnissamik sooq periarfissiisoqarsinnanngimmat. Sivisunerusumik pisoqarpat Ilisimatusarfimmi ilinniakkat nutaat pitsaanerusumik tunngavisinneqarsinnaassapput. Eqqaasissutigissavarput nunat tamat atortagaat naapertorlugit ilinniakkat nutaat kattutsinneqartillugit nalinginnaasumillu universitetimi ilinniarneq kiisalu ilisimatusarfimmi ilinniakkat allat ilaliunnerini qaammatini tallimani arfinilinnilu ikaarsaariartinneqarneri sivikitsuararsuartut isigineqartarmat. Naalakkersuisuni ilaasortaq Tommy Marø tupigusuutigisatsinnik ersernerluttumik nalunaarpoq Ilisimatusarfimmut aningaasaliissutigineqartartut siulersuisut qanoq pisinnaatitaaffeqarlutik aalajangersaasarnissaannut. Tommy Marøp inatsisartut ataatsimiititaliaanut IMAK-imullu qularnaatsumik ilisimatitsivoq, aningaasanut 2008-mi inatsisissaq naapertorlugu siulersuisut ilinniakkanut ataasiakkaanut aningaasaliissutigineqartut allanngortissanngikkaat, aalajangersimasunut aningaasaliissutaareermata. Taamalilluni siulersuisut pingaarnersiuinermi kingulliutitsinissamik salliutitsiniarlutik aalajangiisinnaassanngillat, soorlu Inerisaaviup pikkorisaasarnera pillugu aalajangernissamut. Akerlianik Tommy Marø Juliane Henningsenip Erasmus University Charterimut siunnersuutaanut atatillugu allatut ilisimatitsivoq, oqarluni ataatsimoortumik aningaasaliissutigineqarsimasunit siulersuisunit piniartoqarsinnaasoq. Tamatumani, inatsit naapertorlugu, siulersuisut kiffaanngissuseqarlutik aalajangersinnaapput, universitetimut ataatsimut missingersuusiat aalajangersaaffigalugit namminneerlutillu pingaanersiunermikkut salliutitaqarsinnaallutik. Tommy Marøp siulersuisut ataatsimut aningaasaliissutigineqartut imaluunniit aningaasaliissutigineqartut naalakkersuisumit KIIIP-miillu siumugaaq aalajangersimasunut aningaasaliissutigineqartut aalajangersaaffigisinnavaat, tassaavoq tamanna naalakkersuisumit erseqqissumik akissutigineqartariaqartoq. Kingulleq pineqarpat universitetip siulersuisui kiffaanngissuserutitaassapput, universeteti namminersortuunani, taamaattorli naalakersuisoqarfiup allaaffeqarfiisa ilaattut isigineqaannartariaqarluni. Tassaavorlu apeqqutip qiterpiaa. Ernumanartorujussuuvoq universiteti nunat tamat akuerisassattut ukiorpassuarni siuarsarlugulu inerisaqarnera nukippassuarnik atuffioreertoq maannagaannartinneqarpat. Qularutiginagu oqaatigineqassaaq Ilisimatusarfiup aqutsinermut inatsit maannakkut atuuttoq atorusunnerummagu. Taanna tunngavigalugu sulisut ilinniartullu demokrati tunngavigalugu siulersuisussanik sinniisussanillu aqutsisoqarfinnut qinersisoqartarmat. Ilisimatusarfiulli Naalakkersuisut siulersuisussanik qinerseriaasissaq tunngavigalugu aqutsisussaqartarnissaq tusaatissatut tiguaa. Taamaattoq kaammattuerusuppugut aqutsinermut inatsit tassasariaqarmat nunat tamat tunngaviusumik pissuserisartagaannut ataqqinnituusoq, tassalu universiteti tassaasariaqarluni ilisimatusarnermik qiterititaqartoq. Maannakkut siunnersuutigineqartoq isumakulunnaateqartorujusuuvoq, ilinniartummi paarlateqatigiillutik ilinniartarnissaasa periarfissaannut killiliissaaq aamma Ilisimatusarfik inuussutissarsiutinut piginnaanngorsarfittut nunat tamat akuerisaattut killilersorneqalissaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER