Ilinniartut akerliupput
Ilinniartut aqutsinermut inatsisissaq akerliuffigalugu allagartarsualisaarlutik Nuup aqquserngisigut ingerlaaqatigiipput.
”Ilisimatusarnermut qujalluta akuersaarpugut – kammalaatersornermut naaggaarluta” – ”Pitsaassuseq immikkut inuiaassuseq pinnagu”, tassaapput allagartarsuarni allassimasut ilaat, ilinniartunit Nuup aqqusiniisa quatseruttornerisa nalaanni ataasinngornermi takutikkusutaat. Akerliussutsimik takutitsisut 60-it missaanniittut inatsisartut ataatsimiittarfiata silataanut killipput. Ilinniartut tassaapput GU-mi, Ilisimatusarfimmi ilinniartut, aamma ilinniarfinnit allaneersut Ilimmarfimmi ilinnialertussat akerliussutsimik takutitseqataapput.
Politikerit arlallit ataatsimiittarfimmit akerliussutsimik takutitsisunut anillapput, tamatumani aamma peqataalluni Jonathan Motzfeldt, Siumukkormioqataalu Kultureqarnermut, Ilinniartitaanermut, Ilisimatusarnermut Iligeeqarnermullu Naalakkersuisoq Tommy Marø aamma Johan Lund Olsen, IA Lene Knüppelilu Demokraatineersoq. Marø kinguninngua akerliussutsimik takutitsisunut oqalugiarpoq, inatsisissatut siunnersuummut allannguinissamik nerisorsuuteqanngilaq. Rektorimik rektorillu tullisaanik atorfinititsisoqarsinnaassalluni ilisimatusarsimanermik misilittagaqarsimanissamik piumasaqaateqartoqarani.
Inatsisartut kultureqanermut ataatsimiititaliaani siulittaasoq Kristian Jeremiassen, Atassut, mikrofuunikkut akerliusunut nassuiaassuteqarpoq, ataatsimiititaliami amerlanerussuteqartut isumaqarlutik ilisimatusarnermik misilittaqarnermik piumasaqaatit pisariaqartinnginnerarlugit:
– Ilisimatusarfimmi maannakkut aqutsisuusut inatsit nutaaq atuleriarpat aqutsisuujunnaarsinneqannginnissaannik ataatsimiititaliami amerlanerussuteqartut qulakkiissallugu kissaatigaat, Kristian Jeremiassen oqarpoq.
– Ilinniartut sinniisaat Inatsisartut kultureqanermut ataatsimiititaliamik nalunaaqutaq 17 ataatsimeeqateqarput. Ataatsimiititaliap siulittaasua Kristian Jeremiassen ilinnniartunik tusarnaarnissaminut neriorsuigaluartoq taamaattoq qularnarpoq ataatsimiititaliami amerlanerussuteqartut isumaat allanngussasoq.
- Atassummi oqaluuserereerparput, tamannalu isuma aalajangiusimavarput,Kristian Jeremiassen ilinniartunik akerliusunik suli takkutoqanngisiartoq Sermitsiaq.gl.-mut oqarpoq.