Rubininik suliffeqarfik Thailandimi allaffittaarpoq
True North Gems, Nuup kujataani Qeqertarsuatsiaat eqqaanni rubineqarfinnik misissuinissamut akuersissummik tunineqarsimasoq sullitanut qanittumiissinnaajumalluni Bangkokimi allaffimmik ammaavoq.
Init nutaat taakku ilaatigut rubiinit akuiarneqanngitsut Qeqertarsuatsiaaneersut immikkoortiternerannut suliareqqaarnerannullu atorneqassapput, piginneqatigiiffik nalunaarummi allappoq.
Allaffik ujaqqani pinnersaasianik qalipaatilinnik nunat tamat akornanni qitiusumik niuffaaffimmi inissisimavoq, piginneqatigiiffiullu taamaalilluni atortut immikkortuinnaq ittut Bangkokimiittut atorsinnaalissavaat.
- Bangkok nunat europamiittut arabiamiittullu niuerfii ingerlalluartut aammali Kinami Indiamilu niuerfiit annertusiartuinnartut qanillugit inissisimanermigut rubininik akuiarneqanngitsunik qillissakkanillu nunat tamat akornanni niuernermik qitiusumik inissisimavoq, taamak Nick Houghton, True North Gems-imi tunisassianik ineriartortitsinermut nittarsaassinermullu pisortaasoq allappoq.