Aqutsinermut inatsit suna?
Danmarkimi Kalaallit Ilinniagaqartut Kattuffiata ernumassutigaa Ilisimatusarfimmi ilinniarnerup naleerunnissaa aqutsinermut inatsit nutaaq Inatsisartuni aqagu akuerineqassapput.
-Inatsisip pineqartup aappassaaneerneqareernerani misigisimavugut nipangersimaannarsinnaajunnaarluta akuleruttariaqarlutalu sakkortuumik isornartorsiuilluta, inatsit siunnersuutigineqartoq akuerineqarluni atuutilissagaluarpat nassatarisassai pillugit, Avalaap siulittaasua Parnuna Egede allappoq.
- Inatsit siunnersuutigineqartoq akuerineqarluni atuutsinneqalissappat, Ilisimatusarfiup ingerlariaasianut ullumikkut atuuttumut kinguariaataassaaq annertooq. Assersuutigalugu ilisimatusarnikkut misilittagalimmik (Ph.D.-mik) angusaqarsimanngitsumik Ilisimatusarfik aqunneqalissagaluarpat siunissami nunanik allanik suleqateqarsinnaaneq eqqugaassaaq isumaqatigiissusiorsinnaanerlu killilerneqarluni. Ilisimatusarfiup OECD- p maleruaqqusai malittariaqarpai Ilisimatusarfimmi ilisimatusartut ilinniagaat silarsuarmi sumiluunniit maannakkutut akuerisamik atuutissappata.
- Ernumassutigisatta ilagaat, Ilisimatusarfimmi ilinniartut nunani allani ilisimatusarsinnaajunnaarnissaat, assersuutigalugu Danmarkimi, ilisimatusakkamik nanginnissaanut periarfissaarutivissapput, tassami ilisimatusarsimanerat sutigut tamatigut atussaasutut akuerisaassanngimmat. EU-mi saqqummiunneqartoq Lissabon-imi periuseq (Lissabon strategi), atuutilernera ilutigalugu imaalermat nunani tassannga periutsimik aallaavilinnut ilisimatusarfiisa imminnut suleqatigiissinnaammata, saniatigullu takusinnaavarput Nunarsuaq tamakkerlugu avammut ersarissigaluttuinnarneq ineriartortitaalluni. Unali inatsit siunnersuutigineqartoq taassuma periutsip isumaanut akerlilersuivoq nunatsinnullu ilinniagaqarnerup tungaatigut killilersuissalluni silarsuaq tamakkerlugu. Kalaallit Nunaat, avataanit isigineqarnera ajornerulersinnaavoq aammalu ilinniagaqarnerup tungaasigut mattussaanermik kinguneqarsinnaalluni.
- Takusinnaasagut malillugit Ilisimatusarfiup ukiorpaat sorsuutigisimavaa ineriartortissimallugulu nunatsinni Ilisimatusarfiup nunani siuarsimasuni Ilisimatusarfiit assigalugit inissisimanissi, tassa ilisimatusarnermik toqqammavilittut tamanginnik akuerisaanissartik. Ullumimut angusat kusanartut, inatsisip siunnersuutigineqartup atuutilissaguni, tamaasa sumiginnartissavai kinguariartitserujussuassallunilu, Avalaap siulittaasua Parnuna Egede allappoq.