Biilivit silataa ilualu nukatsitarisalikkit

Bilplejecenter åbnet i Nuuk.

Biilertartugut biilitta asannissaat eqiagisarparput imaluunniit utoqqatsissutigisarparput piffissaqarneq ajoratta. Aap, biilimik ipertoorujussuarmik - iluatigut silataatigullu - biilerusunnerusarpugut. Tamanna maanna qaangersinnaanngorparput - ingammik Nuummi najugaqarutta. Tassami biilerput allanut asatsissinnaavarput, tamannalu peqatigalugu biilerput nukatsissinnaavarput nutaatut isikkoqalersillugu.

Ussassaarutinik sulialik Bo Kleffel aamma Thomas Henriksen Nuummi biilinik paaqqinnittarfiliornissamik isumassarsisimapput. Centereqarfik biilinik annertuumik »nutarteriffik«, iluaniit silataanut.

- Biilitta eqqiarnissaannut tamatigut ulapippallaartarpugut. Tupinnaraluartumik piffissamik atuerusuttarpugut angallatitta eqqiarnissaanut passunnissaanullu. Biilivulli, naaggali, piffissaajaatigerusunneq ajorpavut. Taarsiullugu biilerpassuaqarpoq immaqa qaammatini arlalinni eqqiarneqarsimanngitsunik. Taamattumik uanga Thomas Henriksenilu isumassarsiaraarput Nuummi biilinik paaqqinniffimmik pilersitsiniarluta, Bo Kleffel Biilinut aviisimut oqaluttuarpoq:

Bakterialissuit
- Ullutsinni Kalaallit Nunaanni eqqiluisaarneq oqaluuserisorujussuuvarput, ilisimaviusiulli biilit qanoq amerlatigisut illoqarfimmi aqqunisikkut ingerlaartut qanoq bakteriaqartiginersut. Tamanna ullumikkut uppernarsarsinnaavarput biilit atornikut arlallit eqqiareerlutigit. Tupinnaqaaq biilivut sunik atugassaqartinnerivut.

Biilertartorpassuit biilit eqqiarnissaat qularnanngitsumik ajornakusoorpallaartittarpaat, tassa ineeqqat tamaasa tikissinnaasannginnamikkit. Bo-li Thomasilu taamaasiorusupput. Biilit passuttarusuppaat issiavii, allungiartorfii, natersuaarai nassataasivialu tdamakkiisumik eqqiarlugit. Allaat listii gummit falsiilu salillugit. Aamma tupap tikka, qimmit qitsuilluunniit quuisa tikkat piginnittut taakkua marluk aamma peerutsilluinnarsinnaavaat. Biilip silataa aamma qillersarlugu qillertilersissinnaavaat.

- Biilinik paaqqinninneq biilerluni nuannaarnivimmik pilersitsisinnaavoq, soorlu Bo oqartoq.

Biilinik paaqqinnittartut taakkua marluk biilinik eqqiaanermi aammalu eqqiaassutit qillersaatillu assigiinngisut atornissaannut pikkorissarsimapput - biilit tipigissisillugit - nutarfasilersillugit.

Atuisartut inuinnaat
Danmarkimi biilinik paaqqinniffiit atugaasorujussuupput. Akerlianik Bo aamma Thomasip biilinik paaqqinniffiat, atserneqarsimasoq »Nuuk bilpleje Center«, Kalaallit Nunaanni siullersaavo.

- Isumassarsiarput eqqortuusimavoq. Ullumikkut oqartariaqarpugut biilinik paaqqinniffeeqqatsinnik iluatsitsereersimasugut, Bo oqarpoq.

Manna tikillugu biilinik paaqqinniffik inuussutissarsiortuinnarnik biilinillu iluarsaasarfinnik, biilit atornikut tuneqqinnginnerini kusassaajumasunik, atuisoqartarsimavoq. Sapaatip akunnerani tullermi biilinik paaqqinniffik inuinnarnut ammarneqassaaq.

- Taamaasiussaagut inuinnaat tamanna aamma apersuutigeqimmassuk. Ilami naatsorsuutigisatsinnit sukkanerusumik, Bo Kleffel oqarpoq, biilinillu eqqiaasarfimmini nammineq aamma eqqiaasarpoq.

- Maanna piffissanngorpoq sulisunik marlunnik atorfinitsitsinissatsinnut. Tamatuma aamma kingunerissavaa ullut tamaasa ammasalernissarput. Ullumikkut Thomas uangalu biilinik passussisarpugut ingerlatsivitta aappaani suliitigaluta, Bo Kleffel oqarpoq.

Powered by Labrador CMS