Niels Carlo Heilmannip aningaasaateqarfia nersornaasiivoq
Aalisartut piniartullu arfinillit diplominallutillu 5.000 kr.-nik tunineqarput.
Niels Carlo Heilmannip Aningaasaateqarfiani siulersuisut aalisartunut piniartunullu arfinilinnut sulinermikkut aalisartunut piniartunullu allanut maligassiuilluarsimasunut, najukkaminni aalisartut piniartullu peqatigiiffianni qasusuillutik sulisimasunut kiisalu inunnik allanik ajunaarnissaraluannik annaassisimasunut nersornaasiiniarlutik aalajangerpaat.
Nersosrnaatit ukununnga tunniunneqarput:
Isak Reimer, Ilulissat, taanna aalisartunut piniartunullu allanut maligassiuilluarsimavoq, najukkamini aalisartut piniartullu peqatigiiffianni qasusuilluni sulilluarsimavoq kiisalu aalisartut piniartullu ajunaarnissaraluannik annaassimallugit.
Peter Karlsen, Upernavik Kujalleq, taassuma aalisartut piniartullu ipillutik ajunaarnissaraluannik annaassimavai.
Abel Ludvigsen, Sisimiut, Jakob Sakde, Ukkusissat, Karl Zeeb, Nuugaatsiaq aamma Johannes R. Efraimsen, Alluitsup Paa, aalisartunut piniartunullu allanut maligassiuilluarsimasutut najukkaminnilu aalisartut piniartullu peqatigiiffiini qasusuillutik sullissisimanerannut.