Palet-i peqqinnissamut navianartoq
Inuussutissanik nakkutilliisoqarfiup atuisartut kajumissaarpaat palet-i (siatsinermi mumititsissut) aalajanersimasoq igeqqullugu, tassa misissuinerit takutippaat plastikki palet-ip niaquusaani atorneqartup akuutissanik aminerinik atuinssamut killissarititaasoq qaangerneqarsimasoq.
Imerco-simasup, maanna Pisattat-nik atilllip palet-i aalajangersimasoq niuertarfimmi ilisivinniit peersimavaa, tassa misissuinerup takutippaa, taanna akuutissanik kræfteqaataalersinnaasunik akoqartoq. Aamma Danmarkimi niuertarfiit arlallit palet-i taamaattoq ilisivimminniit peersimavaat.
Atortoq taanna Sisimiuni, Qaqortumi, Aasianni, Uummannami, Tasiilami, Upernavimmi, Ittoqqortoormiuni, Qaanaami, Kangerlussuarmi, Narsarsuarmi aamma Nuummi Imerco Pilersuisorlu aqqutigalugit tunineqartarsimavoq. KNI/Pilersuisoq A/S aamma Pisiffik A/S utertinneqarnissaa pillugu ilisimatinneqareersimapput, namminersornerusut taamak tusagassiutinut nalkunaarummi ilisimatitsipput.
Palet-i sisammik tigummiveqarpoq, kisianni niaquusaa nylonimik sanaajuvoq, taannalu peqqinnissamut navianaateqartoq paasineqarsimavoq.
– Pisattat (Imerco-simasoq) nioqqut taanna tunisarsimavaa. Pisisimasut soorunami aningaasaatitik utertissinnaavaat, nioqqut taanna Pisattanut utertikkunikku, tuniniaanermut nittarsaassinermullu pisortap Per STeen Larsenip ilisimatitsissutigaa.
– Nioqqutissaq taanna maanna niuertarfitsinniit peereerpoq aserorterneqareerlunilu, Per STeen Larsen oqarpoq.