Maalaartarfimmi siulittaasoq nutaaq

Inatsisileritooq Naja Joelsen GA-mi pisortaq Ole Rud taarserlugu Isumaginninnermut tunngasunut Maalaartarfimmi siulittaasunngorpoq.

Naja Joelsen inatsilerituutut ilinniarsimasoq siusinnerusukkut Sisimut Kommuneanni isumaginninnermut ingerlatsivimmi pisortaasimavoq. Aamma Inatsisartut allattoqarfianni sulisimavoq aammalu ullumikkut Nuummi eqqartuussivimmi illersuisutut sulilluni.

Isumaginninnermut tunngasunut Maalaartarfimmi ilaasortat allat tassaapput:

" tukummeq Qaavigaq isumaginninnermi siunnersortitut ilinniarsimasoq Qaanaap kommuneanilu isumaginninnermut ingerlatsivimmi pisortaasimalluni. Tukummeq Qaavigaq ulumikkut namminersortuuvoq.

" Stine Egede Nørbæk, Kalaallit Nunaanni politiit qullersaqarfiani sulivoq, isumaginninnermillu suliat iluanni tamatigoortumik misilittagaqarluartuulluni.

" Nukákuluk Kreutzmann, isumaginninnermi siunnersortitut ilinniarsimasoq siusinnerusukkullu isumaginninnermut pisortaqarfimmi pisortaasimalluni. Nukákuluk Kreutzmann ullumikkut namminersortuuvoq.

" Bendt Frederiksen, aalisartoq/piniartoq siusinnerusukkullu inatsisaretuni ilaarsortaasimasoq. Bent Frederiksen Inatsisartuni siulittaasuusimavoq aammalu Inatsisartut Isumaginninnermut Ataatsimiitsitaliaanni siulittaasuusimalluni.

Isumaginninnermut tunngasunut Maalaartarfik Naja Joelsen siulittaasoralugu siullerpaamik ataatsimiippoq aggustip 31-iani.

Powered by Labrador CMS