Peqqissaasut ilinniartitaanerat misissorneqalerpoq
Ilisimatusarluni suliniut aqqutigalugu nunatsinni Nunavummilu peqqissaasut nunani killerni ilinniartitseriaatsit atorlugit ilinniagaqarneq sulinerlu qanoq misigisarneraat misissorneqalerpoq.
Peqqissaasumut kalaallit kulturiannik oqaasiinillu imaluunniit inuktitut tunuliaqutaqartumut aamma assinganik tunuliaqutaqartunik sullissalimmut, nunani killerni kulturimik paasinnittariaaseq aammalu sulinermi qallunaatut imaluunniit tuluit oqaasiinik annertuumik atuiffiusumi iliniartinneqarneq peqqinnissaqarfimmilu sulineq qanoq sunniuteqarpa?
Apeqqut tamanna tassaavoq peqqissaasup antropologimilu Phd-mik ilinniagaqartup Helle Møllerip ilinniagaqarnerminut atatillugu misissorniagaasa ilaat, ilisimatusarnera Nuummi septemberip aallartinnerani aallartippoq 2008-llu tungaanut ingerlassalluni.
Ilisimatusarnissamut soqutiginninnera Kalaallit Nunaanni Nunavummilu peqqissaasunik amigaateqarnermik, Iqalunni Nuummilu peqqissaatut ilinniarfinni inissat ulikkaaruminaattarnerinik aammalu siusinerusukkut ilinniarnerminni taamaatiinnartartut ilinniagaqarfinnut ilisarnaataasimanerannik tunngaveqarpoq.
Ilisimatusarnermi siunertarineqartut ilaat tassaavoq, pissutsit suut (inuttut, oqaatsitigut, kulturikkut aammalu inuaqatigiinni politikki kiisalu ilinniagaqarnermi pissutsit immikkut ittut) ilinniaqartut ilaasa peqqissaasutut ilinniarnissamik qinigaqarneranut naammassinninnerannullu, ilaasalu sooq ilinniaqaqarnermik toqqaasut naammassinnginnerannulu tunngaviusut nassuiarneqarnissaat.
Siunertarisaq alla tassaavoq aaqqissuussinermi allaasumi, amerlasuutigut nammineq sullitallu amerlanersaannut kulturikkut oqaatsitigullu allaasumi, peqqissaasutut peqqissaasunngorniatullu sulinermut qanoq sunniuteqarnera misissorneqarnissaa.
Misissuinerup inaarneri siunissami peqqinnissaqarfik peqqinnissallu iluani ilinniagarineqarsinnaasut sannaat pillugit aalajangiisarnissanut atorneqarsinnaapput, tamannami aqqutigalugu ilinniagaqartut peqqissaasutut ilinniarnerup imarisaatigut sannaatigullu peqqissaasutut issittumi ilinniarsimasutut passusinissaminnut katsorsaanissaminnullu pisariaqartitaat aammalumi peqqissaasut kalaallisut/inuktitut ilinniarsimasut amerlassusissaat matuneqarsinnaaniassammata.