Tunisat pisiallu oqimaaqatigiissinneranni sinneqartooruteqarneq

Kalaallit Nunaata kisimiilluni naalagaaffittut aningaasaqarnera siullermeersumik qulaajarneqarsimavoq. Kalaallit Nunaanni Natsorsueqqissaartarfiup naatsorsugaasa nutaarluinnaat takutippaat, ukiuni 2000-imiit 2005-imut Kalaallit Nunaata tunisaasa pisiaasalu oqimaaqatigiissinnerisigut sinneqartooruteqartkoqartoq.

Sinneqartoorutit nikerarsimapput 1.374 mio. kr.-nit missaasa aamma 575 mio. kr.-nit akornanni. Tassa inuiaqatigiit ukiumoortumik tunisassiaasa, tassa naalagaaffimmi tunisat nalingisa, 5 aamma 15 pct.-iisa akornanni. Sinneqartoorutit 2004-mi 2005-imilu ikileriarsimapput.

Kalaallit Nunaanni Naatsorsueqqissaartarfik naapertorlugu Kalaallit Nunaata tunisaasa pisiaasalu oqimaaqatigiissinnerat Savalimmiunut sanilliunneqarsinnaavoq, oqimaaqatigiissitsinerit ilaat qiviaraanni. Savalimmiut aningaasaqarniarnerannut aamma takussutissaavoq aningaasaanik annertuunik ataavartunik tunniussisarneq, qallunaat naalagaaffiannit ataatsimut tapiissutinik, kiisalu nunap iluani aningaasaliissuteqarnissamut periarfissanik killilinnik, tamannalu aningaasat nunamit aniatinneqarnerannik kinguneqartarpoq.

Tunisat pisiallu oqimaaqatigiissinnerat angusat ilaasa siullersaraat, Kalaallit Nunaannut tunisassiornermik tunngavilimmik nunamut naatsorsuusiorniarnermi. Suliaq 2006-imi upernaakkut aallartinneqarsimavoq, naalagaaffimmullu naatsorsuutitigut angusat siulliit 2007-p naalernerani saqqummiunneqassapput. Taamaattumik una tunisanik pisianillu oqimaaqatigiissitsinerugallarpoq, naalagaaffimmullu naatsorsuutit nutaat saqqummiunneqarnerannut atatillugu iluarsineqarumaarluni, taamatut paasissutissiivoq Kalaallit Nunaanni Naatsorsueqqissaartarfik.