Sarfaq Ittuk ajoqusertoq
Sinersortaat immalerpoq Maniitsumullu utertariaqarluni. Ilaasunut ajutoornermi ulapungaarsimatitsisoqarpoq.
Sarfaq Ittuk ataasinngormat oktoberip aallaqqaataani unnukkut 115-inik ilaasoqarluni Maniitsumiit kujammut aallarpoq. Maniitsup kujataani naalakkersuisarfimmi igalaat marluk aserorput, imarmillu isaasoqartorujussuanngorpoq. Pisoq piffissap ilaani umiarsuarmik ulorianartorsiortitsinngilaq, tassa umiarsuarmi atortut pingaarutillit tamaasa inuttat tamakkiisumik aqussinnaammatigit. Arctic Umiaq Linep pisortaa Jette Larsen nalunaaruteqarpoq.
Inunnik ajoqusertoqanngilaq, misigisarli soorunami ilaasut ilaannut nuanniissimaqaaq. Pisup kinguninngua ilaasut umiarsuup cafeteriaanut katersortinneqarput, qanoq pisoqarneranik paasitinneqarlutik.
Umiarsuaq maanna Maniitsup avataaniippoq umiarsualivimmullu pulanissaminut silagissiillugu. Maniitsup kommuneata isumaginninnermut ingerlatsivia suleqatigalugu ilaasunut pisariaqartitsisunut ajutoornermi ikiorsiinermik aaqqissuussisoqarsimavoq. Ilaast Maniitsumiit sumunngarfimminnut ingerlaqqinnissaat Arctic Umiaq Linep aaqqissuutissavaa.
Ulluni tulliuttuni paasineqassaaq ajoqusernerit qanoq annertutiginersut.