Skip to main content

Air Greenlandimi timmisartuni saqisut aqutsisut naammaginngilaat

Timmisartuni saqisut pingaartumik ajornartorsiutiminnut aqutsisut tusaajumannginnerat.

Pineqarput akissarsiat, pensiuunit suliffimmi atukkat aqutseriaaserlu. Isumaqatigiissut nutaaq januaarip aallaqqaataani aallartimmat naammagittaaliorneq sukaatereerlugu aallartippoq. Annermik naammagittaalliutigineqartoq tassaavoq pensiuunimut isumaqatigiissut nutaaq, taanna neriorsuutinut naapertuutinngilaq aamma aningaasat sulisunut nakkartut annikinnerulernerannik isumaqartoq, pissutigalugu taakku Kalaallit Nunaanni timmisartuni saqiosut akileraarfigisaanni ilanngaatigineqarsinnaanngimmata.

Air Greenlandimi timmisartuni saqisut 100-it missaanniipput. 70-it missaat Københavnimi – aasaanerani taartaasartut ilanngullugit taavalu 30-it Kalaallit Nunaanni.

Timmisartuni sulisut ulluinnarni inuuniarnertik attassinnaajunnaaramikkut aqutsisut qaammatini arfineq-pingasuni isumaqatiginiarusussimagaluarpaat.

Sulisut sapaatiummat immikkut ittumik ataatsimeersuarsimapput siulersuisussanillu nutaamik qinersillutik. Timmisartuni saqisuniit Air Greenlandimut mailertoqarpoq, tassani kingusinnerpaamik ataasinngornermi ullup-qeqqanut isumaqatigiinniarnissaq naggataamik piumasaqaatigineqarluni. Aqutsisut taamaaliorumanngillat taamaattumik aaqqiagiinnginneq aallartippoq.

Timmisartuni saqisut marlunngormat suliaminnut tunngatillugu ataatsimiilerput taamalu Kalaallit Nunaanni Danmarkimullu timmisartuussinerit unitsinneqarlutik, taamaallaat narsarsuarmiit aqqut ammaannarluni, tassani sulisut qaffasinnerit pingasut saqisullu Københavnimi aqutsisuat timmisartuni ilaasunik kiffartuusisoralugit. Taakku pisortatut isumaqatigiissutikkut atorfeqarput timmisartunilu saqisut peqatigiiffiannut – Air Greenland Cabin Union-imut – ilaasortaanatik. Aaqqiagiinnginnermi ilaasut 600-t missaanniittut eqqorneqarput.

Timmisartuni saqisut akissarsiatik qanoq sivisutigisumik sulisimanerat tapisiallu qasseriarlutik timmisimanerannit aallaaveqartut apeqqutaatillugit tunngaviusumik 16.000-25.000 akornaniittut naammagittaaliutigaat.

Air Greenland aningaasaqarnikkut siumukaannavikkaluartoq sulisut amerlasuut naammaginartumik inuuniarnikkut atugassaqarniarlutik aningaasanik atukkaminnik qallunaat nunaannilu inuuniarnikkut tapiissutinik inuussuteqarput, sulisut tusagassiutinut nalunaarumminni allapput.

Tassunga atatillugu aqutsisut aqutsinerlunnerat sulisut naammagittaalliutigaat, tamanna timmisartornissat pilersaarusiorneqartarneranni erserpoq.

Baltimore-imut timmisartuussisarneq upernaaq aallartippoq. Isumaagaluarpoq Air Greenlandip nammineq atortuni atorlugit timmisartuussisassasoq. Taamaattumik “aasaanerani pakkalussat” suliassanik tigusisussaat atorfinitsinneqarput. Taarsiulluguli aqqut amerikamiut timmisartuutileqatigiiannut tunniunneqarpoq, taamaattumillu sulisut amerlanerusut aqqut taanna agguaattariaqalerlugu. Taamaammat timmisartuussinerit ikinnerulerput malitsigisaanillu isertitat ikinnerulerlutik.

– Akissarsiaqaatiginagu sillimasuusariaqartarpugut, naammagiittaalliummi taaneqarpoq.

Sulisut taakku aamma naammagittaalliutigaat kiisami marlunnik timmisartuussillatualeraanni tulleriisiinnavillugit inissinneqartartut, iluamik qasuersaarfissaqarnani.

– Peqatigitillugu timmisartuussinernut illersorneqarsinnaanngitsunut pinngitsaalineqartarpugut, timmisartuni saqisut oqarput. Kalaallit Nunaanni silap pissusaa pissutigalugu piffissami sivisuallaami sulisariaqartarpugut – sillimasuussussaanerput silallu pitsanngornissaanik utaqqinerit ilanngullugit. Aqutsisut naapertuilluarsinnaassuserput sakkugaat – sulisut nutaat qasuersimasullu pinnagit, sulisoq Sermitsisaq.gl-imut oqarpoq. Saqisut aamma isumaqarput aqutsisuusut qasuersaarnissamut aalajangersakkanik sumiginnaasut.

– Sulinissamut qasuersaarnissamullu malittarisassat unioqqutittuarpagut, aamma isumaqatigiissutinik unioqqutitsinerit sillimaniarnermut navianartorsiortitsisut, saqisuniit oqaaseqaammi erserpoq.

– Aqutsisut sulisunik naalatsitsiniaallutik ersisaaraluni aqutsineq ”management by fear”. Allakkatigut sioorasaarinerit timmisartumi toqqissisimajunnaarsitsisarput. Inuinnaavugut inuillu sullitaralugit. Aqutsisunit tapersersorneqanngilagut, aammalu suliaqarpugut sunniuteqaqataaffiginagit misigisimaffigisatsinnik, saqisut sinniisaat oqarpoq.

– Timikkut pisariaqartitat tunngaviulluinnarut pineqartut pitsaassusissamut neriorsuutigineqartumut naapertuutinngillat, saqisutut sulisut suli suliaminnut atatillugu ataatsimiittut oqarput.

– Pingasunngornermi sulilerumaarnissaat suli aalajangiiffigineqanngilaq.

Air Greenland Cabin Union-imi (saqisut kattuffiat) siulittaasoq Anders Mark Jensen oqarpoq, timmisartuni saqisut sapinngisaminik suliartoqqugaluarlugit.

Air Greenlandip pisortaanera Mihcael Binzer isumaqatigiissummik unioqqutitsilluni siumut ilisimatitsinertaqanngitsumik sulinermik unitsitsinermi isumaqatigiinniarsinnaanani.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER