Sillimaniarneq pitsaaqaaq

Air Greenlandip aqutsisuisa sillimaniarnerup navianartorsiutinneqarneranik oqalunneq eqqunngitsuunerarpaa

Air greenlandip aqutsisuisa Air Greenlandip timmisartuussinerani sillimanissap sumiginnagaaneranik oqarnerit sakkortuunik oqaasertalerlugit eqqunngitsuunerarpaat. Taamatuttaaq aqutsisut erseqqissarpaat qasuersarnissamut aalajangersakkat unioqqutinneqanngitsut. Tamanna Air Greenlandimiit pingasunngornermi ullap-tungaani tusagassiutinut nalunaarutaanni atuarneqarsinnaavoq.

Oqaaseqaammut tunngaviuvoq, timmisartumi saqisut marlunngormat Sermitsiamut oqarmata timmisartuussinernut illersorneqarsinnaanngitsunut tatineqartasimallutik.

– Kalaallit Nunaanni silap pissusaa pissutigalugu piffissami sivisuallaami sulisariaqalersinnaasarpugut – tamatumani sillimasuusussaanerput silallu pitsanngornissaanut utaqqisarnerit ilanngullugit. Aqutsisut nalunngeqatiginnissuserput atorlugu tativaatigut – sulisunik nutaanik qasuersimasunillu taarsernata, sulisut ilaat Sermitsiamut oqarpoq. Saqisut aamma isumaqarput, aqutsisut qasuersaarsimanissamut aalajangersakkanik eqquuitsinngitsut.

Timmisartumi saqisut marlunngormat tusagassiutinut nalunaarummi aamma ”sulinissamut qasuersarnissamut malittarisassanik unioqqutitseqattaarnerit, aammalu isumaqatigiissummik unioqqutitsinerit sillimaniarnermut navianartorsiortitsisut” uparuartorpaat.

Air Greenlandip aqutsisuisa taamatut oqarnerit eqqunngitsuunerarpaat.

»Ilumoorpoq sila kalaallit nunaannilu pissutsit immikkut ittut timmisartuutileqatigiit timmisartuussinikkut sulisuinut ilaatigut timmisartumi saqisunut piffissap ilaani suvisuumik suliffiusinnaasarmata, kisianni sillimaniarneq navianartorsiortinneqanngisaannarpoq aammalu piffissaq suliffik/qasuersaarfik pillugit timmisartornermi malittarisassat atuuttuusut unioqqutinneqarneq ajorput«, tusagassiutinut nalunaarummi atuarneqarsinnaavoq.

Powered by Labrador CMS