Naapittussaagaluarpugut
Michael Binzer aqqiagiinnginneq pisariaqanngikkaluartoq tupigusuutigaa.
Timmisartumi saqisut aqutsisuusunit ataatsimeeqatigineqarumannginnermik oqarnerat Air Greenlandip pisortaanerata tupigusuutigaa.
– Sapaatip akunnera una ataasinngormat timmisartumi saqisut siulittaasuat Anders Mark Jensen isumaqatigiissuteqarfigaarput pingasunngornermi nal. 16.00 ataatsimeeqatiginiarlugit – tassa ippassaq. Taamaakkaluartoq timmisartumi saqisut marlunngorpat ullaakkut suliumajunnaarput. Taamaattumik timmisartumi saqisut aqutsisunit oqaloqatigiumaneqannginneraallutik oqarnerat eqqunngilaq. Tupigusuutigilluinnarpara timmisartumi saqisut suliumajunnaalertinnatik ataatsimeeqatigiinnissaq taanna akueriumasimanngimmassuk, Michael Binzer oqarpoq.
Timmisartumi saqisut siulittaasuata Anders Mark Jensenip uppernarsarpaa timmisartumi saqisut ajornartorsiutaat pillugit Air Greenlandip aqutsisuinik ataasinngormat ataatsimeeqateqarnissaq isumaqatigiissutigineqarsimasoq.
Taamaakkaluartoq ajornartorsiut uaniippoq, timmisartumi saqisut isumaqatigiissutip ilaanik isumaqatigiinniutiginneqqinnissaq kissaatigalugu piumasaqaatigaat, tassa pensiuunimut tunngasortaa – sulisut isumaqaramik pensiuunimik isumaqatigiissusiaq nutaat jannuaarip aallaqqaataani atuutilersoq pillugu eqqunngitsumik paasissutissinneqarsimallutik. Aqutsisuusut timmisartumi saqisunik oqaloqatiginnikkusukkaluarput, kisianni isumaqatigiissutit atuuttut ingerlareerneranni nutaamik isumaqatigiinniaqqinnissaq kissaatigisimanagu.
Taamaattumik aaqqiagiinnginnerit marlunngormat ullaakkut aallartipput.
– Kisianni timmisartumi saqisut ajornartorsiutaat pillugit oqaloqatiginissaannut piareersimavugut, Michael Binzer oqarpoq.
Sulinermut tunngatillugu Eqqartuussiviup maanna aaqqiagiinnginneq aalajangiiffigisussanngorppaa. Suliaq eqqartuussivimmut tassunga ullaaq manna nal. 10.00 tunniunneqarpoq, eqqartuussisullu qallunaat nalunaaqutaat malillugu nal. 15.00 naapissapput.