Saqisut pisortanit tapersersorneqarnissartik ujartorpaat

– Pisortanit tapersersorneqarusuppugut timmisartumi suliagut pitsaasumik suliarisinnaajumallugit. Ajunngitsumik pineqarutta pitsaanerusumik kittartuussisinnassaagut, saqisut oqarput.

Saqisut ajuusaarutigisorujussuaat pisortanik ataatsimeeqateqarusullutik suliumajunnaartariaqarsimagamik.

Ilaasortat 13-it sisamanngornermi unnukkut Nuummiittut tallimanngornermi ullaakkut suliartornissaminnut aalajangerniarnertik assut ajornakusoortissamaavat. Tamarmiullutik oqarput suliumajunnaaqqinnissaminnut aalajangerniarneq ingasagilluinnarsimallugu.

Tamarmiullutik ilisimavaat nunatsinni innuttaasunut tamanna qanoq pingaaruteqartigisoq, inuit pilersaarutigeriikkaminnik angalaniarnerannut unititsillutik.

– Saqisunut ajornarnerpaasimavoq inunnit ilisimarisaqarnertik taakkulu nalunngikkaatsik, ingammik Ilulissani, Nuummi Narsarsuarmilu najugalinnit, saqisut sinniisaat kinaassutsiminik ilisaritikkusunngitsoq, pisumut qaangiutereersumut oqarpoq.

Sunaliuna suliumajunnaarnissamut pisariaqartitsisimasoq?

– Pingaarnerpaatut taaneqarsinaasoq tassaavoq pensiuuninut isumaqatigiissut nutaaq. Taanna pillugu pisortanik ataatsimeeqatiginninniartarsimagaluarpagut, pisortalli ataatsimeeqatigerusussimanngilaatigut. Isumaqatigiissut naammassineqarmat ilisimatinneqarpugut 500-700 koruuninik qaammammut akiuliuteqartariaqassasugut. Januarilli aallaqaatanit qaammammut 2.000 koruuninik ilanngaanneqartarpugut. Tamannali akissaqartinngilarput.

– Alla tassavoq napparsimatilluta allakkatigut siorasaarutinik tunineqartarnerput. Pisortat akuerisariaqarpaat tunillatsijasuugatta napparsimasinnaasarlutalu, ingammik inunnik sulissinitsinni. Sulinitsinni qiimalluta suliassanullu tunniusimasuullutalu piareersimanissarput pingaartuuvoq. Iluaqutaanngilaq nuatsilluta timmisartumi sorlummittarluta pigutta. Taamaattarnerput pisortanit soqutigineqarnavianngivippoq. Atorfinititsisoqartillugu ilisimatitsisoqartarpoq ullut napparsimaffiusut amerlasuujussanngitsut, sinniisoq oqarpoq.

– Suliffipput sinnerlugu timmisartumi sullissisarpugut, pingaaruteqarluinnarporlu pitsaasumik sullissinissarput, ilaasunit tatigineqarluta ilaasugullu toqqissisimassallutik. Eqqaamasariaqarpoq ilaasut taamasa sullittussaagatsigik, meeqqat uttoqqaallu, napparsimasut peqqissullu. Pitsaasumik sullisserusunnerput pisortanit tapersersorneqartariaqarpoq tatiginnittariaqarlutillu. Atorfinitsitaanngilagut kaffisortitsisartussatut. Ilaasut isumannaatsumik ilaanissaat pillugu atornitsitaavugut, tassa taana pingaarnerpaavoq kaffisortitsinissaq pingaarnerpaanani.

– Misissuerusuppugut sulisut suliffitsik nuannarineraat aamma Air Greenlandimi tulluussimaarlutik sulinersut. Timmisartortitseqatigiiffik pitsassuuvoq. Pisortanilli tapersersorneqarusuppugut, nunatsinni kisimiilluta sulisarpugut. Dash 7-mi helikopterinilu ilaasut kisimiilluta kiffartuuttarlugit. Pitsaasumik ilaasunut kiffartuussinikkut suli pitsaanerulersinnaavugut. Tassaavugut ingerlatitseqatigiiffik sinnerlugu ilaasunut toqqaannartumik kiinnertartut. Ilaasut timmisartumi pulaartitut pisarpagut, pitsaanerpaarlu anguniarlugu ilaasunut kiffartuussiniartarpugut suliffippullu tulluusimaarutissanngortinniartarlutigu.

– Neriuutigaarput pisortat sinniisorporlu pitsaasumik ataatsimeeqatigiissasut, pisortallu aaqqivigerusutagut pillugit tusaaniarumaartut, taamaalilluta ilaasutsinnut pitsaanerusumik sullissilersinnaassaagut.

– Pisortat soqutigisarilluinnassavaat timmisartumi naammagisimaarinnittunik sulisoqarnissartik naammagisimaarinnittunillu ilaasoqarnissartik. Sulinermi misilittakkat sungiussisimalertitsisarput ilaasunut isumannaannerulertitsisarlutik.

– Sulisut taarseraannerujussuat ukiuni kingullern nalaassimavarput sulinermi atugassarititaasut pillugit. Pisortat tamanna aaqqiivigisariaqarpaat.

– Pitsaasumik aaqqiisoqarpat aqqutissartuassaq tassaavoq sulinermi atugassaritaasut pitsaasuunissaat sullitatsinnut, ilaasunut pitsaanerpaamik sullisisooleqqulluta. Ajuusaarutigeqaarput suliumajunnaarsimanitta ilaasunut sunniuteqarnerlunnera. Sulileqqinnissarput qilanaareqaarput, saqisut oqarput. Taakku sisamanngormi unnnukkut Nuummiittuuppput.

Saqisut ilisimatitsipput pisortat oqaloqatiginnikkusuppata tallimanngornermi suliartorniarlutik. Pisortallumi neriorsuipput saqisullu tallimanngornermi ullaakkut suliartorput.

Tallimanngormi ualikkut oqaloqatigiissinnaalerput?

Powered by Labrador CMS