Naalakkersuisut saattuarniarneq ammaqqippaat
Biologit kaammattuutaannut naapertuutinngitsumik Sisimiut avataani itinersuarmi saattuarniarneq naalakkersuisut ammaqqippaat.
Aalisarnermut naalakkersuisoqarfiup aalajangerpaa Sisimiut avataani itinersuarmi saattuarniarneq aggutsip 15-ianiit oktobarip 31-iata tungaanut ammaqqinniarlugu aalajangerpaa, Namminersornerusut ilisimatitsipput. Sisimiut avataani itinersuarmi saattuarniarneq ukiuni kingullerni matoqqatinneqarsimavoq, aalisapilunneq peqqutigalugu.Taamaannerani saatuat amerliartoqqilersimapput, Namminersornerusut ilisimatitsipput.
Aalajangiineq biologit 2007-imut siunnersuutaannut akerliuvoq. Pitsannguallalaaraluartorlu Pinngoritaleriffiup isummani allanngortinngilaa.
– Sisimiuni saattuarniarnerup ammaqqinneqarnerata tulluartuunnginnera aalajangiusimavarput, ilisimatooq AnnDorte Burmeister Aalisakkanut Raajanullu immikkoortortaqarfimmeersoq taamak Sermitsiaq.gl-imut oqarpoq.
Aalisarnermut siunersuisoqatigiit siunnersuutigaat aalasarneq saattuaqassutsimut sapinngisamik eqquinaveersaartinneqarnissaa, piumasaqaatit sisamat tulliuttuni taaneqartut piumasaqaatigalugit:
" Saattuat qaleruaat 115 mm-nik minnerussanngillat
" Pullammi ataatsimi pisat agguaqatigiisillugu minnerpaamik 6 kiiluussaaq
" Sisimiut avataani itinersuarmi annerpaamik 350 tons aalisarneqarsinnaapput
" Pullatit ataatsit agguaqatigiisillugu saattuat 2 kiilumik oqimaassuseqassapput