Qaqortumi meeqqat qinusartut
Takornariartitsinermut pisortap meeqqat takornarianut qinnuuloortartut ernummatigai. Taassuma sapaatip akunnerata tulliani umiarsuarnut ilaallutik takornariat tusindilikkaat tikinnissaannut paatsiveeruttoqarnissaa aarlerigaa.
Qaqortumi meeqqaat illoqarfimmut takornariartartorpassuarnut aasap ingerlanerani tikittartunut qinnuuloortarput, minnerunngitsumik umiarsuarmut ilaallutik takornarianut. Qaqortumi takornariartitsinermut pisortap Pitsi Høeghip ernummatigaa, tamanna takornariaqarnermut kinguneqarnerlussinnaasoq.- Ajornartorsiut annertungaatsialereerpoq, Pitsi knr.gl-imut oqarpoq.Pitsip oqaluttuaraa meeqqat tuluttut oqaatsinik ataasiakkaanik ilikkareersimasut, oqaatillu taakku takornarianut atortarlugit. Oqaatsit soorlu ”give me money” imaluunniit ”one dollar” meeqqat atorpaat. Ullunilu kingullerni ajornerulersimavoq, meeqqat namminneerlutik takornariat kaasarfiinut manguttalersimagamikkit, Pitsi Høegh oqaluttuarpoq.Taamaattumik takornariartitsinermut pisortaq ajornartorsiut pillugu Qaqortumi atuarfimmut politiinullu saaffiginnissuteqarsimavoq. Pingaartumik Umiarsuarujussuaq takornariartaat »Grand Princess« sapaatip akunnerata tulliani tikittussaq takornariartitsinermut pisortap ernummatigaa. Umiarsuarmut ilaapput amerikamiut takornariat 3000-t inuttallu 1500-t, taakkulu ilarpassuit qularnanngitsumik Qaqortumut niusussaassapput, illoqarfimmut takornariarlutik.– Inuit taamak amerlatigisut illoqarfimmiitillugit paatsiveerunnersuaqarsinnaavoq, meeqqat aqunneqarsinnaajunnaarsinnaallutik, Pitsi Høegh Sermitsisaq.gl-imut oqarpoq.Taamaammat inuppassuit tikitsinnagit Pitsip meeqqat Qaqortumi Tasersuup Atuarfiani atuartut atuartinniarlugit neqeroorutigisimavaa. Pitsip ilaatigut piitsuulluni inuuneq qanoq ittuunersoq takutinniarpaa, Asiamiit immiussanik piitsorpassuarnik qinnuuloortunik imalinnik takutitsinikkut. Aamma atuarfimmit meeqqat ullaap-tungaani illoqarfimmi angalaannginnissaannik neriorsorneqarnissani kissaatigaa, piffissami tassani atuarfiup tunngaviatigut meeqqat akisussaaffigimmagit.Pitsi Høeghi nammineq oqarneratuut saaffiginnissutini pillugu Tasersuup Atuarfianiit suli akissutisisimanngilaq.