Savaaqqanik toqoraaneq ataasinngorpat aallartissaaq
Neqi A/S-ip savaaqqat 700-t ullormut toqorartarsinnaanissaat naatsorsuutigaa
Annonse
Narsami ataasinngorpat savaaqqanik toqoraaneq aallartissaaq. Inuit 50-55-it missaanniittut toqoraanermi suleqataassapput.
Toqoraavimmi pisortaq Henning Sønderup: – Kalaallit Nunaata kujataani savaalittit siammarsimasut 50-t missaanniipput. Savaatillit savaaraatitik ataasinngorpat Narsamukaassorlugit aallartissapput. Ullormut savaaqqat 700-t missaanniittut toqorartarnissaat naatsorsuutigaarput.
– Savaaqqanik toqoraanermut oktobarip 25-iata 26-iatalu missaani naammassissangavarput. Savaaqqat neqaat piaartumik sinerissami illoqarfinnut nassiussuunneqassapput. Naatsorsuutigaarput juullertinnagu saqaaqqat 8-9.000-t ilaatigut niuertarfinnut nassiussuussinnaajumaassallutigit, Henning Sønderup oqarpoq.