Sooq Uunartimi qulliit qaminneqassappat?
Inatsisartut Ilaqutariinnermut Ataatsimiititaliaata paasisinnaanngilaa sooq Uunartimi innaallagissiorfiup Nukissiorfinnit matuniarneqarnera
– Uunartimi innaallagissiorfiup matuneqarnissaa Ittoqqortoormiut kommuniani inuttut ingerlalluarnissamut aammalu sukisaarsaarnissamut periarfissanut qanoq iluaqusiisinnaasutut Naalakkersuisut isigaat, Ilaqutariinnermut ataatsimiititaliami ilaasortat aperipput.
Emilie Olsen, Ruth Heilmann, Agathe Fontain aamma Astrid Fleischer Rex qanittumi Illoqqortoormiuni angalapput.
Angalanertik kingorna naalakkersuisunut saaffiginnissuteqarput.
– Innuttaasut ingerlalluarnissaannut atugarissaarnissaannullu pingaaruteqartutut isigalugu Uunartip sukisaarsarfittut attatiinnarneqarnissaa Ittoqqortoormiut kommuniata maanna ilungersuutigaa.
– Uunarteq imigassartorfiunngitsoq imigassamik ajornartorsiutilinnik katsorsaanissamut periarfissaqarpoq aammalu meeqqanit inuusuttuaqqanillu atuarfimminngaanniit aallaarsimaarfigineqartarluni. Kommunip innuttaanit minnerunngitsumillu utoqqarnit Uunarteq asiartarfittut annertuumik atorneqartarpoq.
Kommunimi pissutsit pillugit Ilaqutariinnermut Ataatsimiititaliaq tikeraarnermini erseqqinnerusumik nassuiaaffigineqarpoq innuttaasut atugarisaasa inuunermilu naleqassutsip nukittorsarneqarnissaat anguniarluni piffissami sivisuumi kommunip siunnerfilimmik suliniuteqarnera iluatsilluartoq Ilaqutariinnermut Ataatsimiititaliap tikeraarnermini ersarissumik paasivaa.
– Tamanna ingerlaannaqqunaqaaq, kommunimili inuussutissarsiutitigut ineriartortoqarnissaa pisariaqarpoq, taamaaliornikkut suliffissaaleqisut amerliartuinnartut ikiliartortinneqarsinnaaqqullugit, Ilaqutarinnermi ataatsimiititaliaq isumaqarpoq.