AGDLEK nunatsinnit aallarpoq
Nakkutilliissutip nunatta imartaani ukiuni 33-ni aalajaalluni angalasareerluni nunarput qimappaa. Danmarkimut maannakkut ingerlaarpoq siunissami sunissi nalullugu.
Kangilinnguani sakkortooqarfik nittartakkamigut allapoq AGDLEK` Grønlands Kommando sinnerlugu nunatta imartaani 1974-mili nakkutilliisoq, imartatsinni assigiinngitsorpassuarnik suliaqartarluni angalasarluni nunatsinnit aallartoq. Imaani annaassiniartarsimasoq, sikunik aserorterisarsimasoq, kalinnittarsimasoq aalisariutinullu alapernaarsuisarsimalluni, tassaapput Agdlerup suliarpassuisa ilagisimasaat.
Nakkutilliissutit sananeqarmata aalajangersimaqqissaartumik umiarsualiarineqartut Agdlermik taaguserneqarsimapput, soorlu aamma TULUGAQ aamma AGPA, Agdlertut umiarsualiaarinearsimasut. Kangilinnguanit Thorshavnikkoorluni Frederikshavnimut, km-erit 3600-it angallavigeerluigit, tulappat pisataajarneqassaaq Frederikshavnimi sakkutuut umiarsuaasa talittarfiannut talitsinneqassalluni. Pilersaarutaavoq Frederikshavnimut septembarip 16-anni tikissasoq.
Nakkutilliissutip angalanermini suliarisimavai: Aalisariutinut 900-it missaanniittunut alapernaarsuisimalluni, sømilit 5000-it angallavigisimallugit. AGDLEK` suneqassanersoq suli ilisimaneqanngilaq. Sulili angalalluarsinnaammat qularnanngitsumik nunatta imartaani aamma siunissami angalaqqissinnaassaaq.
AGDLEK nakkutilliissutini pingasuusuni nutaanik taarserneqartussani siullersaavoq. Nakkutilliissutip siulliup nunatsinnut tikinissaa 2008-p aasaani pilersaarutaavoq.